the avenger

CHAPTER SIX (THE AVENGER)

‘ Al ngau ku ngambi indu nuan auk?  Nadai pengapit aku.’ Pia ka Ray nanya kaban ya Al. Al mina naggun ke pala tanda setuju. Ray alu tama dalam opis ya. Ray siko orang ka gawa ba sepital ngau Al. Seduai  udah lama bekaban ari mula seduai belajar nyentuk ka gawa. Al angkat ngelawa pintu belakang makmal sepital nuju pondok luar. Maya nadai pengawa dia meh Al selalu ngelantang ke ati. Tambah mega keja maya sari nya mimit aja. Al mina meda bala anambiak sekula praktis main bol. Al ingat suba maya ya ba kolej ya selalu main bol ngau kaban ya.

Pengudah tembu beradu dia Al nurun ngagai seperis ke udah dicatar Ray kena sida ya ngambi indu ngagai menua pala wong. Datai dia ya meda Ray ngau bala ya benung ngankut utai kena ngerami ka Ray melah pinang malam tok. Nyau bebulu orang tama dalam seperis. Bala indai apai Ray duduk ba luan seperis. Al tama seretai ngau kaban ya Ray. Orang dalam seperis benung besadung ke utai.

Pama nyema disebut ke ngambi indu sigi mayuh bala mensia gau. Ni bala ayak bala ibuk ngau bala kaban. ni ke benung betundi pangan diri nyau mabuk kedua maya mupuk kin. Nya meh pemanah kitai iban sigi datai ngerami ke bala diri empu. Taja kaban datai meh meri sukung tulong ngagai kaban diri. Kadang nulong ari segi duit enda kurang nulong datai awak ka orang melah pinang asai ka raja sari. Maya nya meh semua orang baik enda ngira kaban belayan datai meda bala sida ya rami. Taja orang benung capuh ngirup tang Al enda ngau sida ya. Tambah mega Al ukai orang pengirup.

Balat asap insap dalam seperis ngau tedengus bala mensia. Nyema disebut ngirup bisi aja meh bala mensia nginsap. Ukai mega nya aja ni ke belagu. Pama ga seperis nya bisi nyedia ka ndur keroke. Tambah mega tokey seperis nya ngelala Ray nya meh ya meri bonus ngagai Ray. Nyau petang utai peda Al dalam seperis nyau enda ulih enseput. Dia Al angkat alu nuju pintu seperis. Dia Al meda kaban ya Ray nyau merah mua ya baka undang kena tunu. Ray nemu kaban ya nya ukai pengirup. Nya meh Ray ngawak ka kaban ya. Pengudah pansut ari perut seperis Al niki ngagai atas. Orang ba atas dia sama baka ke dalam seperis benung besadung ke ai. Ni ai bir, tuak ngau arak. Al mina tuchum meda ulah sida ya. Dia Al merati ke pemanah rampa dunya ulu Sarawak ba batang Rajang. Rindu amai ati ya meda nyau bekacit aja gambar diambi Al.

Pengudah 2 jam pejalai, sida datai ba sigi rumah panjai. Al meda amat manah rumah panjai nya. Nyau ngalah ke banglow. Tambah mega rumah panjai nya amat panjai. Enda berasai Al nyau ngira dalam ati. Bisi 75 pintu rumah nya dikira ya. Orang udah sedia nganti sida ya ba pendai. Pengudah seperis sangkai dia meh pemayuh bala ya ngangkut barang bai ngagai ruai orang indu. Al bejalai nitih ke kaban ya. Nangka pengerami maya orang ngambi indu. Ni ke nebah tawak bendai bisi mega bala ngajat maya niki rumah nya. Tambai Sarawak diayan ke sida ya. Tekenyit Al ninga munyi senapang dikacit ke orang ngalu ke sida ya datai. Maya tama ke ruai Al enda ngelepas ke peluang ngambi gambar.

Maya sida ba ruai nangka pemayuh indu dara dia udah nganti. Nyau bepegai ke kuan. Pengudah meling ruai 2 kali sida ya pan duduk ba ruai. Enda berasai ari siang ngalih malam. Amat manah adat kitai iban taja baru bekelala ngau pangan diri nyema nama udah iban sigi mayuh amat utai kerandau. Nyau betusut kedua. Nasit bisi ai kena betusut. Ray mai Al tama ngagai bilik entua ya.

 Nyau melut mata Al meda utai ba ruang tamu. Taja kumbai orang rumah panjai tang nangka pemaju iban diatu bisi kusyen nyau baka hotel dalam ya. Tibi nangka pemesai. Dia meh pemayuh orang indu dalam bilik.

‘ Al, tok meh bakal bini ku Mia nama ya. Peda nuan nangka pemajik ni enda ati tudah aku tekait. Tambah ga mentas uji nuan ngiga baka nya ila kaban’ telai Ray ngagai Al. Mia siko indu amat manah nadai endur mantah pemajik ya dia Al betabi ngau bini Ray.

‘ Apu tok menantu aku..amat sigat menantu aku tok enda aku nyangka nuan amat sigat jang’ pia ko indai tuai ba tisi Mia. Nyau tekenyit tudah Al ninga jaku bakanya.

‘ apu salah orang nuan ibuk aku kaban Ray ibuk nganu Ray legi’ pia saut Al

‘ pia..anang irau jang kami ditu mayuh indu dara pemilih jang untung amat enti orang ngempu nuan nyadi menantu jang madah ke aku nuan jang nyema bisi indu ngait ati nuan jang hahahaha’ pia ko indai tuai nya. Sigi mayuh orang mancal maya pengerami. Orang mancal nya meh selalu manjai ke malam ngerancak ke malam. Nyau tuchum Ray ninga jaku tundi indai tuai nya.

Pengudah mandi dia Al masuk ke ngepan ke ya ngapit Ray malam legi. Penembu ya dia Al pansut ngau Ray ke ruai duduk ba tisi Ray. Nangka meh bala indu dara meda Al. Taja Ray sigat tang enda telaban ka penyigat Al. Udah ga Al tinggi pemurak nyau ka sebaka ngau orang indu. Tambah ga pisin bok amat manah. Nyau ngenung bala indu dara meda ya. Bisi kedua nya bekirim salam nyau alah Ray ke melah pinang malam nya.

‘ Nya meh aku ka nuan ngau aku, awak sida indu dara meda aku bisi kaban sigat hehehehe ulih nuan masang nginti malam tok kaban’ telai Ray ngagai Al. Al mina tuchum enda memunyi. Nyau malu puas diperati ke bala indu dara. Sigi baka orang laki ga nyema indu dara nyau enda putus-puts ngirum salam ni ke ngepai nyau malu ga orang laki. Ukai nama sigi orang ka nundi tambah mega Ray madah ngagai sida ya Al tok siko laki ke pemalu.

Pengudah ninga bala pengulu ngau tuai rumah bejaku dia meh sida ya nyau capuh baru. Orang nyau benung besadung ke utai. Tincin udah disarung jadi meh Ray ngau Mia malam nya. Bendar amat orang bamboo isan malam nya. Sigi adat iban bambu isan ngau ipar maya nya. Al ngau siko indu benama Tasya benung nyadung ke ai nitih Ray ngau bini ya ari belakang.

‘ Apuuu..sigat amat bujang tok nyema nuan bedau bebini jang ngiga ditu meh nuan’

‘ Nyema ka bebini nyin anak dara aku nyin satup nuan jang’

‘ Sayau aku udah nyadi ibuk nyema agi dara suba udah nuan jang aku kuntik’ pia jaku tundi orang maya Al nyadung ai. Nyau tuchum Tasya ninga. Al nyau nyadi majak malu. Nyau merah mua ya ditundi bala sida ibuk. Pengudah nyadung ai Al tama ke bilik nukar baju alu duduk sepiak kaban ya Ray. Taja orang benung capuh ba ruai tang Al enda  ngau sida ya laban Al ukai orang pengirup.

‘ sigat amat kaban nuan nya Ray nama ga ya enda ngau orang ba luar deh? Nyau benung capuh orang ba ruai dia. Karoke sida ya dia legi.’ Pia ko entua Ray.

‘ Sigi baka tu kaban aku tok indai laban ya ukai pengirup mina ngirup ai biasa ja’ pia saut Ray. Al baka ke enda ninga ngirup ai oren ke di sedia ke orang dia.

‘ apu amat manah orang bujang tok udah ga sigat ukai pengirup nginsap enda ga nadai endur mantah pemereti orang bujang tok.’ Pia saut entua Ray. Bendar amat orang mai Al mujuk Al ngirup tang enda alah taja nyau betugung bala indu dara serumah nya tang enda meh ulih meri ya ngirup. Bisi mega mai ya betanda ngansar ke kaki malam nya.

‘ Ray nama kaban nuan nya bisi pangan ka? Nyelai amat kaban nuan nya ka ya ngau begagai tang enda ngirup tambah mega ya tak imun gaya ari tadi enda bebunyi mina tuchum ketawa’ pia ko Mia nanya laki ya.

‘ Ukai nama nya Mia suba bisi meh ya pangan tang ketegal pangan nya meh ya merinsa. Pengelama tua udah bekaban enti enda salah ingat aku bisi 3 taun Al nadai pangan. Pangan ya suba udah jadi ngau orang bukai nya meh Al baka ke nadai ati ka bepangan. nemu nuan Mia utai ngasuh aku tusah amat ati suba meda Al maya pangan ya melah pinang ya datai. Enti aku kapa aku datai enda aku nemu runding Al nadai aku nemu laki pementas baka ya nya. Pia ko ya nyaut aku suba taja aku enda ngempu ya amat aku datai meda ya jadi laban aku ngai kumbai orang ukai kaban ila. Taja pangan ya udah jadi ngau orang bukai tang Al ngau pangan ya nya selalu ga mesej ngau pangan diri. Nadai kala aku meda laki cukup penyayau cukup mentas baka ya nya. Berapa kali aku mai ya betemu ngau indu bukai tang mina kaban ko ya ga.’ Panjai saut Ray. Dia Mia baru nemu penusah nuntung tudah Al.

Ari ke tiga dia meh sida Ray mupuk mulai kediri mai bini ya Mia. Datai ba bandar Al alu ka mutar ke diri laban pegila nyau keja. Ray agi cuti laban sigi baka orang baru jadi.

‘ Jaga manah bini nuan kaban nyema bisi nama-nama giga ja aku kaban aku sigi datai’ pia ko Al nabik Ray. Ray nemu kaban ya sigi ari suba nya meh Ray sayau ngau kaban ya.

Al mupuk mulai ke diri ke rumah. Datai ba rumah dia Al duduk masang tibi. Al diau kediri ba rumah ke beli ya. Taja rumah flat tang rumah nya cukup pemesai. Benung Al kisuk meda tibi dia telipun ya bebunyi.

Hye Al..ulih bekelala Tasya tok. Pia ko munyi mesej terima Al. Al tuchum kediri. Nyau majak rindang meda tibi. Dia meh Al berunding kediri berunding ke pengidup diri. Taja pangan ya nyau jadi ngau orang lain nyamai meh Al nerus ke idup ya ngiga orang ulih nyaga ya ila. Al alu malas mesej Tasya. Enda berasai nya tetinduk Al bemesej ngau Tasya.

Pukul  7 dia jam Al bebunyi. Nyau tekenyit Al angkat dani madam ka jam ba telipun ya. Dia Al meda bup. Bup bechurak biru betulis DAIRI PENGERINDU ba atas meja ya.

“ Dini penatai bup tok? Angka bai ku suba kini” pia ko Al alu macha bup nya. Pengudah mandi Al beradu ka mupuk gawa. Nyau sebulan Al bepangan ngau Tasya. Gaga amai Ray meda kaban ya nyau bisi tawing. Nangka penguntung Tasya bulih laki ke cukup mentas ngau ya. Maya lepa dia Al mai ya bejalai mai Tasya makai. Mayuh masa Al mina ngau Tasya. Kekadang Al mai Tasya makai ngau kaban ya Ray ngau bini ya. Pengerindu ditanggam ba ati nangka pendalam. Asai ke ngai lepas ari pangan diri seduai Al ngau Tasya. Amat mentas Tasya ba ati Al. Taja baru sebulan bepangan Tasya nadai kala ngaga ulah mina ngau Al kulu kili. Maya ari minggu Tasya sigi ngau Al pulai ngagai rumah Al. Dia Tasya meda bup bechurak biru ba atas meja.

‘ Al nuan nulis dairi ka? Lawa amai nama dairi nuan dairi pengerindu ulih ku nulis nama tua ditu awak di kingat tua belama?’ pia ko Tasya alu macha bup nya

‘  enda aku kala nulis dairi angka bup bala kaban aku kini nya nyau tinggal ditu tulis dia meh pama meh jadi ila ’ pi ko saut Al ari dapur. Taja laki Al nemu meh nyumai. Laban Al selalu ngidup kediri nya meh ya nemu ngintu diri. Taja Tasya nemu berapi tang maya ari minggu sigi Al berapi Tasya mina meda ya aja ngau Al ba dapur. Nya meh diatu ukai indu ja nemu berapi laki nemu meh. Laban  ketegal sayau meh Al selalu nyumai ke Tasya nyema Tasya bemalam ngau ya. Maya nya meh Al ngelayan Tasya baka kumang. Tasya sigi asuh ya mina duduk meda ya berapi. Ukai nama laban ya nemu Tasya lelak maya keja tambah mega keja Tasya selalu travelling kin kia. Nya meh Tasya makin ari makin sayau ngau Al. taja sigat tang nemu ga berapi nyema indu tetemu ke laki bakatu nangka meh penguntung ya asai ke digaga orang baka kumang.

 Nyema Al bejalai Tasya sigi bisi ba tisi ya tang nya meh sangka panas sampai ke lemai nemu ujan tengah ari. Sangka panjai begulai tang semua udah atur petara.

Pemulai keja Al alu ke kedai meli barang. Al sigi deka bejalai dulu laban ka betemu ngau Tasya. Al nemu Tasya nyewa ba endur atas kedai endur ya meli barang. Taja meda Tasya udah cukup ngagai Al. Mina meda tuchum aja udah cukup ngubat ati ke benung nanggam pengerindu. Tasya nengguk ba jendila dia ya meda Al benung bebeli ke utai. Tasya nurun taja enda lama betemu pama meh kena ngubat ati ketegal pengerindu.

Malam Tasya pulai ari keja nuju ngagai rumah sewa ya. Endur ya nyea enda jauh ari endur ya gawa. Taja udah begulai tang Tasya sigi enggai diau ngau Al laban seagi seduai empai jadi melaki bini seduai sigi bedau ga diau sama. Tasya takut ngai ke telanjur ila enda alah mai pemalu pulai ke rumah. Pemulai Tasya malam nya Tasya enda nemu ya dititih ke siko laki. Tasya nangka pemajik ngau pemurak sapa laki ke betemu ngau ya sigi geram meda Tasya. Tambah mega Tasya tinngi buk panjai.

Datai ba rumah sewa ya Tasya muka pintu. Semina Tasya siko aja nyewa rumah dia. Laban ketegal ka ngidup kediri meh Tasya mina kediri nyewa rumah nya. Enda mukai-mukai Tasya asai ka di ju ke orang ari belakang. Nyau labuh gali ba ruang tamu. Dia Tasya meda laki siko datai alu tama bilik ya. Laki nya alu ngunci bilik ya nutup mulut ya ngena kain.

Tasya angkat ka ngelaban tang nama meh daya tulang indu ngelaban laki. Dia laki nya nancang jari Tasya ngena tali. Ka Tasya nyerauh tang mulut udah ga di tancang. Mina ngelingkang aja meh tudah Tasya. Laki nya majak narik ke baju ngau narit tancut ya. Ngau sesabak tudah Tasya ngetan ka maruah ya empu. Laki nya baka ka dirasuk. Ambis baju tancut Tasya di buka ya dia laki nya begadai muka tancut ya. Tasya mina nyabak aja nyau nadai daya ngelaban. Baka mayau meda cit laki nya ngeruyas ke tubuh Tasya. Mina petara aja nemu penusah ninggang Tasya. Ka ya lari udah ga kaki kena tancang. Laki nya bendar amat ngulih ke tubuh Tasya. Nyau keberai ai mata Tasya. Pengudah laki nya bulih tubuh Tasya laki nya alu angkat muka tali nancang jari ngau kaki Tasya. Laki nya alu pansut ari rumah Tasya ninggal ke Tasya nyabak deduie kediri. Deka ya madah ngagai Al takut Al nganu ya tang enda ulih di pelalai ke  ya agi penusah dalam ati dia ya nelipun ngagai Al.

Malam nya ati Al asai ke enda nyamai. Asai ka bisi utai ke jai nyadi. Amat ko orang nyema kitai bepangan ati asai ke nyadi sigi. Al ninga telipun ya bebunyi. Dia Al ninga sada nyawa Tasya benung nyabak. Sinu amai ati Al ninga penusah ninggang tudah Tasya. Ngau lengkas Al ngagai rumah sewa Tasya. Dia Al meda Tasya nadai bebaju ba dalam bilik mandi. Balat amat Tasya nyabak kediri. Al datai alu merap Tasya. Begadai Al meri Tasya gari. Nangka pemedis ati Al malam nya. Bendar amai Al merap Tasya. Enda ya ngadang ati Al berasai enda nyamai nemu nya penusah datai nuntung Tasya. Al mai Tasya pulai ke rumah ya.

‘ Tasya..bemalam ditu meh nuan aku bisi nyaga nuan’ pia ko Al merap Tasya benung nyabak ngenang penusah diri. Nyau asai ke nyerauh Tasya nyabak malam nya. Malam nya mega Tasya bemimpi rawan ketegal penusah nya. Penusah baka tu sigi ninggal kesan ba indu. Taja udah di gaga orang bakanya tang Al enda ninggal ke Tasya ngapa.

Seminggu pengudah penusah nuntung Tasya dia Tasya enda ulih ngetat penusah ati diri. Al ngelayan ya selama tok amat manah tang nama utai ulih beri ya gagai Al?  Tanah udah ga di kumai orang bukai. Tang Al nadai ngira nya mina pengerindu ati Tasya aja meh pinta Al ari Tasya. Kekadang meda pemanah Al ngibun ya nyau enda berasai ai mata nitik. Sayau laki ngemanah nuan nya Al bulih indu kamah baka aku pia runding Tasya.

‘ Al minta ampun nyema aku ngenusah ke nuan selama tok…manah amat nuan ngau aku tang aku malu Al…malu meda diri empu kamah bakatu….malu aku ngau nuan nadai utai diberi agi ngagai nuan’ pia ko jau Tasya ngagai Al.

‘ Al orang ke masung aku malam nya ukai orang bukai tang pangan aku suba Tugo.’ Pia ko Tasya alu nyabak merap Al.

‘ anang irau nuan dara nyema tanah dikumai orang bukai dia meh aku bumai amat nuan meri aku pengerindu meri aku ati nuan. Aku amat sayau ngagai nuan dara.’ Pia saut Al. amat manah saut Al taja Tasya tinggang penusah tang Al sigi sayau ngagai ya.

Pagi pegila pengudah Al nurun keja dia Tasya benung nyembi gari. Enda ya nemu penusah ninggang ya suba jampat amat tersebar. Nyema berita manah sigi laun datai tang berita jai laju amai mansa pending. Berita jai laju agi ari berita manah laban berita jauh selalu ngelabuh ke orang.

‘ Nya indu kena pasung orang suba eee…enda malu kasih laki nya udah ga sigat begulai ngau indu nadai empedu malu’ pia jaku dinga ya

‘ Kasih tudah Al anang-anang indu nya sigi deka minta pasung orang gamal dah ngena’ pia ga jaku orang

Tasya mina enda memunyi tama ke bilik ngetat ke pemedis ati. Enda ya nemu penatai ya ditu nyau ngemalu ke tudah Al. Enda orang bukai nemu selama tok Al nya meh nulong nyukung ya tambah mega ukai Tasya minta kena nasib bakanya. Sapa-sapa sigi enggai kena pasung. Nangka meh pemalu ditanggung Al selama tuk ketegal mai Tasya diau ngau ya. Nyau keberai ai mata Tasya. Laban ketegal pemalu Tasya mai ati malu mutus ke seput ya kediri. Tasya ngirup racun. Enda berasai rekung ya asai ka ditanggas ngau ai angat mata ya nyau kabur. Sebedau Tasya mutus ke nyawa diri empu dia ya nulis surat. Surat  ke digaga awak ka orang enda nyalah ke Al enda ngemalu ke Al. putus meh seput tudah Tasya. Datai keja dia Al meda tubuh Tasya nyau tengkering. Nyau rerauh tudah Al meda orang ke disayau ke  ya nya kempang amai ninggal ke ya.

Penusah ati enda ulih ditagang bendar amat Al merap tubuh Tasya. Nangka ulih meh Al nguji nyambung seput Tasya tang utai ke udah nadai sigi enda ulih dipulai kebaru. Al mina nyabak keberai ai mata meda orang ke disayau udah ngejang pegi. Nyau gegetar jari Al megai Tasya. Nyau baka ulah orang gila Al deka ngidup ke Tasya. Dia Al meda surat ba tisi Tasya…

Al, aku sigi sayau ngagai nuan sampai mati tang aku enda sanggup meda nuan nanggung pemalu ketegal aku. Selama aku tinggang penusah nuan meh nyukung nulong aku awak ke aku ulih ka idup baru. Tua beserara ukai ketegal laya tang ketegal pemalu ninggang aku. Laban penyayau aku meh aku mutus ke nyawa kediri laban aku enggai ninga orang bejai nuan ngemalu ke nuan

                                                                                  Ari aku orang ke disayau kenuan Tasya

Pia munyi surat nya. Nya asai ke di pandam dada ketegal surat nya. Nangka meh pemedis ati nangka meh penusah ati Al. udah ga orang ke disayau ke ya ditinggang penusah tambah mega orang ke disayau ke ya nyau ngejang pegi. Taja pan Tasya udah gejang pegi tang danji mesti di ingat.

Pengudah seminggu Tasya ngejang pegi dia Al meda bup bechurak biru. Begadai Al muka bup nya maca nama seduai ya ditulis dalam bup nya. Ketegal penyayau  Al bejaku kediri ba mua bup nya

‘ Nyema orang bukai ulih begulai sejalai nyema nulis nama ba bup tok? Nama aku enda ulih. Nyema edna ulih meri meh aku jalai awak ka aku ulih malas pemati Tasya’ pia ko Al. ketegal penggerindu meh mensia sanggup ngaga utai lebih ari batas. Nangka meh pengerat jari digenggam Al. enda berasai ai mata labuh.

Benung Al kediri berunding kediri dia ya meda ayas Tasya duduk ngerimbai ya

‘sulu ku Al dalam bup ya  meh aku nyimpan gambar orang ke masung aku…sulu aku Al aku sayau amat sayau ngau nuan’ pia ko Tasya.

Dia Al meda gambar siko laki alu bisi tulis alamat endur diau ba gambar nya. Al alu angkat mai bup nya.

‘ Amat jaku Tasya…’ pia runding Al. Ngau lengkas Al ngambi kunci kerita alu nuju ngagai alamat rumah ke ditulis belakang gambar nya. Nyau merah mata Al nangka pemedis ati. Dia Al meda siko laki benung pansut ari pagar rumah nya.

‘ Nyin bangkai mensia nya…legi nuan Tasya mati ketegal nuan ketegal nya meh nuan mati ga’ pia ko Al.

Benung laki nya nguing ka tama lorong dia Al masuk ke gear kerita alu mecut laju. Nyau tepelanting laki ke ngena motosikal lantak Al. Bedau sempat laki nya angkat ngaga nama-nama Al ngemai besi alu malu pala laki nya enda ngetu. Nyau teperecik darah laki nya pansut. Pengudah nya Al nama ke laki nya dalam bonet kerita. Nyau besai munyi seput laki nya. Datai ba dalam kampung, Al ngemai lakinya jauh agi. Datai din dijamah ya laki nya. Nyau biru mata laki nya nyau patah jari laki nya dipalu Al ngena besi. Nangka pemedis ati Al meda laki ke ngambi nyawa orang ke disayau key a.

Enda puas ngau nya dia Al ngetak kaki laki nya. Nyau baka ngetak tulang manuk Al ngetak ya. Ka laki nya nyerauh tang mulut udah ga di tancang. Ka ngelaban jari udah ga patah mina ngetat aja meh laki nya. Nyau basah bup bechurak biru kena tinggang darah laki nya. Dia Al ngepam minyak ari moto ya. Nyimbah ngagai tubuh laki nya. Sebedau nya dia Al netak utai laki nya. Nangka pemerinsa laki nya dikeja ka Al. Tang Al nadai ati deka munuh laki nya mina deka merinsa ke ya aja

‘ Nyamai asai nuan bakatu nuan ngaga Tasya suba tok aku malas ke Tasya. Empai abis aku merinsa nuan akih tok agi bedau’ pia ko Al alu nunu sepiak tubuh ngau mua laki nya.

Nyau rerauh laki nya nangka meh pemerinsa digaga bakanya. Nya meh pemedis ati siko laki enda sama. Nyema orang ke disayau dipasung orang bukai siko laki ulih nyadi baka antu. Nyadi baka jelu ketegal sayau meh Al ngaga bakanya. Laki nya nyau luput ketegal enda ulih ngetat ke pemedis. Pengudah nya dia Al meresa laki nya agi idup ke bedau. Nya balat kesuh seput tudah tuai. Nyau jauh malam Al mai laki ke udah diperinsa ya ba tebing tasik alu nikau ke laki nya dia. Nangka meh pemedis udah ga nyau kaki kena tunu tubuh sepiak tamabh  patah ga jari nyau ditinggal ba tebing tasik kena ai masin nyau bepedi asai telih.

Al alu mulai kediri. Tang danji udah ditulis. Dia meh bup nya ningat ke danji. Danji Al ngau Tasya begulai sejalai. Dia Al meda Tasya sepiak ya duduk tuchum malik ngagai Al. nangka meh pengaga Al meda orang ke disayau key a ba tisi ya. Nangka meh pemajik Tasya ngerimbai ya megai jari ya. Dia meh bup nya deka ngamat ke danji. Danji pengerindu segulai sejalai seidup semati. Benung deriba dia Al meda siko laki duduk ba belakang ya megai bup nya alu bejaku

“ Al aku meh empu bup tok anang irau nuan seduai sigi segulai sejalai sampai mati” pia ko laki nya pengudah nya laki ngau bup nya lesap nadai agi dia baka ka ditaban ke angin mina Tasya agi bisi ngerimbai ya. Nangka meh pengaga ati meda indu ke disayau tuchum meda Al. Al nemu ya ngau Tasya sigi segulai sejalai sampai mati.

Malam sigi nya dia Ray tekenyit ninga rita kaban ya Al mati siden. Kerita ke kena Al labuh ngagai gaung. Ray enda bejaku ninga rita kaban ya udah ngejang pegi. Ray datai ngagai rumah endur orang nyegai kaban ya. Ari jauh Ray meda dua iko mensia. Mensia amat dikelala ia mensia benama Tasya ngau Al ngepai ya ari jauh. Ray asai ke enda pecaya Al ngau Tasya udah ngejang pegi ninggal ke ya.