chapter 9 (a fate)

CHAPTER NINE (A FATE)

Danji majak digaga anak mensia ke benung ngayam pengerindu. Danji dipendam ba dada ditulis ba bup. Bup ke dikangau Dairi Pengerindu bup ke mayuh meda nyawa midang lesi ketegal danji bup datai nagih danji bup ke datai ngamat ke danji ke udah digaga awak ka pangan diri idup segulai sejalai seidup semati nyentuk ke sebayan…nya meh di kumbai Dairi Pengerindu.

Igat siko laki ke benung gawa ba opis kunsil. Siko ari anak iban ke megai pangkat besai. Taja pia Igat semampai ingat penatai diri empu nya alai Igat minta pindah agai menua ya awak ka ia ulih nyukung nulong bala bangsa ya ba menua ulu. Taja menua ulu tang pemayuh orang diau dia ulih ngalah ke pemayuh mensia ba menua besai tambah mega mensia dia mayuh bangsa kitai iban bisi ga bangsa bukai diau ba menua ulu.

Taja besai pangkat Igat nadai kala tinggi jaku ngau orang bukai laban Igat nemu nyema kitai bepangkat besai ulah kitai sumbung nyau tinggi idung nadai meh orang ka manah begulai ngau kitai mayuh agi orang ngelari kediri ari kitai. Udah tiga taun Igat keja dia tang Igat nadai kala diau ba bandar laban Igat enggai ninggal ke indai apai ya kediri ba rumah panjai nya meh Igat selalu berundang ari rumah panjai. Penjauh rumah panjai Igat ari bandar semina sejam setengah nyema ngena kerita nyau baka pendani orang ke nangkal nyema Igat nurun keja tang Igat lembau amat diau ba bandar amat keja perintah gaji besai igat enda kempang ati ninggal ke apai indai Igat ke udah tuai kediri ba rumah panjai.

Jeman diatu enda baka suba taja ba rumah panjai diau ba ulu pan bisi meh jalai tar laban udah digaga perintah kena mansang ke menua ulu jalai nya meh nyambung ke menua ulu rumah panjai sida Igat ngagai bandar kelebih agi jalai nya beguna ngagai mensia diau be rumah panjai kena sida ya mai getah ngau sayur dijual ba maket tau ka tisi jalai ngulih ke anak duit kena belanja. Nyema orang ke bisi pegung tau ka kolam ikan jalai nya meh kena sida ya mai ikan tau ka jelu ulih nimbak ulih panjuk dijual ba pasar laban Igat ngena kerita hilux Igat meh kekadang endur sida ya ngemai barang tauka ngirum ke barang ke dibeli. Taja pia Igat nadai kala mantah laban ya nemu sida ba kampun dia nadai utai kena ngagai pasar taja bisi kerita mansa jalai nya tang jarang amat kerita tama ngagai menua sida ya tambah mega jalai tama ngagai ruma sida Igat bedau digaga tauka ditar mina ditabur ngau batu kuari aja.

Kekadang apai indai Igat ngau Igat ke pasar laban ka ngagai klinik ngambi ubat tauka peresa ba sepital nya meh kebuah Igat ngai ninggal ke apai indai ya kediri ba rumah panjai Igat nemu ya siko aja ari sida serumah bisi kerita kena ngemai sida ya serumah ngalu ke pasar. Pengelama mai bala sida serumah ke pasar Igat nadai kala minta bayar taja diberi orang duit tambang Igat sigi enda ngambi duit nya ukai ketegal ya ngai ukai ketegal ya enda cukup tang ati Igat cukup manah cukup badas deka nulong sida serumah. Tiga taun Igat nyadi kepala kunsil ba menua sida ya sepenglama nya meh menua sida ya tambah nyamai selalu ditulong perintah selalu nerima bantu ari opis betanam tupi nya meh sida serumah amat sayau ngau Igat semampai ingat ke sida serumah.

Pengudah datai ba bandar Igat selalu duduk ba kedai kupi enda jauh ari opis ya. Dia Igat mesan ai ngau utai diempa laban kedai nya meh selalu endur sida sekaban etemu sebedau mupuk ngagai opis tambah mega tokey kedai nya ngelala Igat kekadang enda bebayar ga utai dempa Igat pama bangsa bukai manah ngau bangsa kitai ukai ketegal minta lebih minta apa nama tang meda pemanah siko-siko mensia bangsa bukai nemu meh ‘menilai’ siko mensia. Nyema bangsa kitai lain agi ga ulah ya ngai meda bangsa diri empu maju ka agi meda bangsa diri empu merinsa meda siko-siko maju dia bangsa kitai alu ngaga ubat ngubat orang ke mansang ari kitai. Uji kitai bela mansang memagang nyema ngai meda orang mansang anang meh kitai ke ngelabuh ke orang nya nyamai kitai niti singkang orang ke mansang ari kitai pegila lusa datai meh orang nulong kitai nyema ati kitai badas tuhci beresi.

‘ Tumu mat nuan saritu Igat enda takut  nuan deriba kediri tumu pagi ari rumah panjai nuan ngagai bandar? Enti aku kada ke ka aku kediri tambah agi tumu amat dani apu..bekulat mata aku enti bakanya’ pia ko siko laki duduk sepiak Igat ngulur ke jari ka betabi.

‘Nadai orang ngacau ucak nyema ke ka ngacau nya ukai antu nya mensia ka nyadi antu hahaha…’ pia saut Igat.

Nil siko laki ke bekeja sama opis ngau Igat tang Nil semina keja nganjung tauka ngambi barang aja tauka dikangau opis boy taja pia Nil nya meh kaban Igat amat-amat suba maya Igat baru mula keja dia Nil nya meh nulong Igat suba enti orang lain enda ibuh kira meda bisi bos tauka orang baru ngau keja sigi enda dipalik tamh agi igat nyadi bos ari jaku ngalu ke tudah igat ari betabi bekelala ngau Igat mayuh ke agi sida ya bejaku jai ari belakang tdah Igat. Bakanya meh ulah kitai mensia meda orang datai baru keja tauka nyadi bos ukai nya ka betabi tauka bekelala ka agi bejai ke pangan diri jauh ari tuchum tauka bejaku ngalu ke penatai siko-siko.

Pengudah ngirup pagi seduai bejalai nuju ngagai opis Nil ngambi surat ke datai ba opis semina nitih ke Igat ari belakang nyentuk ke datai ba endur opis Igat.

‘ Bisi kini-kini nuan lemai tok Igat? Enti nadai bejalai tua legi auk ka ngemai nuan makai ba ‘open-air’ legi meda indu utai dia pegila ari enam bajalai meh ngau aku’ pia ko Nil mujuk Igat

‘ Auk meh legi tua kia kaban ka amat nuan nguntik indu legi enda ga bai jadi uji bai jadi ulih ga ngau rami. Sebotol dua ulih ga aku sepunsa hahah’ ko Igat

‘ ukai aku aja pia kaban nuan sama meh Igat nyau tiga taun ditu nadai ga pangan uji ngiga kitai hahaha awak ka sama bulih kaling pangan diri hahaha’ ko Nil ketawa Igat mina enda bebunyi majak tuchum. Dia meh Igat nyau berunding kediri pengamat jaku Nil nya tadi. Lama ga Igat udah keja ba ditu tang nadai ga pangan.

‘ Keja dulu aku kaban legi berandau baru ga’ pia ko Nil

Igat mina meda Nil bejalai pansut ari opis ya nyau majak berunding ga tudah Igat ninga jaku Nil nya tadi taja seduai betundi tang jaku Nil nya bisi amat isi ari kuah lama tudah Igat enda bejaku majak berunding dia meh Igat meda fail ba meja ya. Taja jari rindang nulis gaga keja tang runding Igat nyau ke bukai nyau ingat ke apai ngau indai ya ba rumah kasih ga apai ngau indai nyau udah tuai nyamai ngiga orang ke ulih nulong ya ngau nyaga ya tauka apai indai ya umur majak utai ukai nya majak muda tiap taun umur majak niki tang nadai ga pangan nadai ga bini ba tisi maya senang tauka tusah.

Abis keja dia Igat ngau Nil bejalai ngelantang ke ati tambah mega pegila ari enam ukai bisi keja mayuh ke agi masa pegila kena tinduk tau ka ngau apai indai ya nyual getah ke ditangkal mayuh ke agi masa pegila kena berandau ngau sida serumah ni ke ngambi tauka nganjung sida serumah ngalu ke kedai nulong sida serumah ngangkut sayur bejual ba maket.

‘ Kaban uji nuan meda bala indu utai nyin uji nguntik nyin tua kaban ni nemu panjuk ngait legi hahhaha’ nyau simbing mulut Nil nunjuk ke bala indu dara duduk ba meja senentang ngau seduai ya.

‘Alai meh nuan kaban angka nuan berani agi ke tua hahah’ pia saut Igat. Nil ngau kekasak ka angkat deka ngetan ke ngintik ngadu ke umpan kala bisi ikan ba lubuk. Ari jauh Igat mina meda ulah kaban ya Nil

‘ Berani ga nuan ngelawa bala indu dia kaban tang nyema bos ngangau ke nuan nyau lelubah nuan mansang tang sama ga nya tadi bela indu’ pia jaku tundi ari Igat

‘ Nya lain kaban taja indu tang pangkat ya besai amat nyema nuan kaban enda nuan malu laban sama bela bisi pangkat aku mina opis boy  enda alah anu ya aku hahahaha,,tusah ga diatu kaban burung pipit ukai tau sama terebai ngau burung kenyalang’ sempama ga Nil mansut ke jaku sempama nyau tuchum Igat ninga jaku kaban ya.

Pengudah seduai tembu makai dia Igat deka mulai kediri nyau udah jauh malam enda alah apai ngau indai ya ngiga Igat legi tambah mega jalai ngagai rumah panjai ukai baka jalai ba bandar tambah ga api jalai empai ga digaga mina api kerita meh nerang nengau jalai. Dia Igat begadai deriba takut siden tau ka belantak ngau orang laban maya malam mayuh ga orang bejalai ni ke nimbak begiga ke munsang tambah mega luri balak ari kem ngena jalai nya.

Benung deriba mansa sepital dia Igat tepeda ka dua iku indu misi benung pansut ari kerita. Siko peda igat benung mansut ke tayar ari bonet kerita nyau sinu ati meda seduai ya nyau ngeringak muka skru tayar nyau baka ke muka skru tayar luri. Ukai tulang orang indu baka tulang orang laki dia Igat ngetu ke kerita ya alu ngelawa dua iko indu ke benung kiruh muka tayar kerita.

‘Nama penyai kerita seduai wai?’ Tanya Igat

‘ Tayar kerita pancit wai lelak amat muka tayar ya ari tadi muka enda ga ulih’ pia saut indunya

Dia meh Igat nguji nulong seduai ya kira setengah jam tembu meh tayar kerita diganti Igat nya meh kitai ke laki anang meh kitai kelalu lembau nulong sida ke indu maya tusah laban pengering indu ukai sama ngau laki tambah mega laki sigi digaga petara kena nulong bala indu nyema ditinggang penusah.

‘ Terima kasih wai nyema nuan nadai kada enda pegila baru tua ya ulih nukar tayar kerita’ pia ko indu nya bejaku alu ngulur ke jari mai betabi.

‘ Enda ngawa nya deh wai sigi baka kitai meh nulong pangan diri nyema ditinggang penusah. Seduai keja ba sepital ka?’ Tanya Igat

‘ Auk indu misi ba sepital nama aku Michele nyin kaban aku nama ya Lin nuan deh wai aku ka meh nemu nama orang ke nulong aku..’ pia ko Michele

‘ Kangau ja aku Igat’ ko Igat madah gai Michele

Pengudah bekelala dia meh asai ke bemimpi betemu ngau pangan diri taja enda lama betemu ketegal penusah dia ati asai tetengut ke betemu baru.

‘ Ah..rugi amat enda minta numbur telipun indu nya tadi’ pia ko runding Igat

Datai ba rumah nyau tedani apai ngau indai Igat meda penatai anak seduai nyau laun amai pengelama tok Igat jarang amat laun pulai nyau baka pulis seduai nanya Igat laban Igat nemu apai ngau indai ya irau meda ya pulai laun dia meh Igat berandau ngau apai indai ya madah utai ke nyadi maya ya pulai ke rumah tadi.

Baka selama Igat dani tumu laban nulong apai ya ngangkut getah ke dijual ba maket pagi legi taja gaji besai tang Igat nadai kala ngasuh apai indai ya badu nangkal bekebun tauka bumai laban pengawa baka nya meh nyadi lalau pengidup ya tambah mega orang tuai ukai baka kitai ke biak nyema enda gawa tauka bekebun sida ya sigi enda nyamai duduk ba rumah nyau kekasak ngiga pengawa ke dikeja.

Datai ba pasar pengudah nyual getah Igat mupuk meli barang kena bai pulai mai apai indai ya makai ba kedai sebedau mupuk mulai ke diri

‘ Nuan Igat..??’ pia Tanya siko indu cukup pemajik indu nya semina tuchum aja ulih ngelabuh ke ati orang meda ya nyau kekesap mata Igat meda indu ke nanya ya bendar ya berunding ngingat ke indu ke nanya ya nya.

‘Nuan Michele..apu kumbai ku sapa tadi nyau enda ngelala aku’ pia ko Igat

Nyau baka ke udah lama bekelala seduai Igat ngau Michele berandau taja baru betemu dia meh Igat ngumpul pengering ati deka nyuluk bungai ke benung ngerembai tambah mega bungai nya amat damping ngau ya nya asai ke belagu indu nya bejaku ngau Igat nyau nadai didinga jaku indu nya mina mua indu nya aja diperati ke Igat.

‘ Michele..ulih ku mai nuan bejalai ngau makai ngau aku malam legi?’ pia Tanya Igat ngau ati berani

‘Ulih nadai salah nya tang aku keja legi pukul lapan baru pulai’ pia saut Michele

Enda Igat nyangka Michele nyaut munyi nya nyau asai ngerembai ati nyau asai ke dipegai bungai ba mata enda Igat nyangka Michele ka bejalai ngau ya gaga amat tudah Igat ninga saut munyi nya nyau tuchum kediri Igat. Pengudah Michele mupuk igat ngau bala ya mupuk mulai kediri ke rumah mayuh amat ga bala anambiak sida serumah numpang Igat. Nyau penuh belakang hilux ngau anambiak bisi ga ngau Igat dalam. Datai ba rumah dia Igat nuci kerita ketegal debu jalai nyau lekat ba tisi kerita benung Igat nuci kerita dia Igat tepeda bup bechurak biru ba belakang kerita ya ngau lengka Igat ngambi bup bechurak biru nya enggai ke basah ke ai.

‘ Sapa empu bup tok? Anang-anang bala anambiak tadi simpan aku aja meh bup tok nemu orang ngempu bup tok ngiga aku legi nyema ya nadai tetemu ke bup tok’ pia runding Igat nyimpan bup nya dalam kerita ya.

Bendar amat Igat nganti jam beputar nyau enda ulih kira Igat malik merati ke jam ba lengan pama ati udah tetengut ke betemu seminit asai ke sejam bendar amat nganti ari siang bekalih ke malam. Pukul enam setengah lemai pengudah madah ngagai apai indai ya Igat mupuk begadai laban ke betemu ngau pengerindang ati tambah mega seduai udah bedanji ka betemu pukul lapan ngai jadi ga laun laban indu sigi menting ke jam nyema ka betemu laun mimit sigi udah nadai jalai agi laban indu nyema madah jam tok jam nya sigi maya nya meh sida ya deka betemu nyema laun sigi pulai bala indu tambah mega nyema indu nya gawa.

Enda berasai nya labuh ga ujan nyau lelubah tudah Igat deriba udah ga jalai licin ya ga mayuh ga luri kayu mansa maya malam tambah agi luri ngangkut sawit nyau penglama deriba dia Igat datai ba sepital endur Michele gawa. Michele udah bediri nganti ba luar nasit amai agi sempat betemu ngau bungai juluk ati gaga amai igat meda Michele benung dedegi nganti penatai Igat. Lelubah Igat nyangkai ke kerita ya ba mua Michele dia Michele tuchum meda Igat datai ngemai paying bechurak celum kena ngelindung Michele ari kena ujan. Laki nyema ya sayau gai indu biar ujan tujah meh pama ati dah keran nadai ngira basah tau ke angat mina penyiru ngau penyayau aja dalam ati tambah mega enti baru betemu sigi balata mat pengerindu ngerembai dalam ati.

Udah mai Michele tama kerita dia Igat mupuk gegadai deriba kerita nuju ke kedai mayanya Igat tepeda Michele gegetak celap kena ekun kerita tambah agi ari ujan udah ga baju Michele bisi ga kena tempias ujan. Igat ngambi baju celap ya udahnya nyua ngagai Michele.

‘ kena meh baju celap nyak enggai ke nuan majak celap legi nyau sakit nuan legi aku ga tussah nyaga nuan hehehe..’ pia ko Igat nguji ati Michele. Michele enda bebunyi mina tuchum meda Igat alu masuk ke baju celap nyak. Udah bejalai ngiga ndur engkah kerita dia seduai ya ngelawa kedai makai. Ka Igat mai makai ba open-air tussah ga laban ari ngumba amat nyau majak ujan nyau asai ke datai ba tulang penyelap maya angin bepuput.

Dia enda berasai Igat merap Michele ngai ke Michele kena tempias ujan. Datai ba kedai pengudah seduai ya duduk dia meh Igat mesan pemakai seduai ya. Kira dalam sejam seduai duduk dia enda berasai amai jam bepusin sisgi bakanya jam selalu aja jilis meda orang benung nanggam pengerindu. Sejam asai ke seminit meh maya udah berandau bekelala ngau pangan diri ngelalai ke juluk ati diri. Indu nyema ka ke orang laki tussah amai ka nemu nyau baka ke ngiga entelah nyema ka nemu juluk ati indu. Igat enda ga bangat jugau pemuas berunding dia meh Igat nemu juluk ati Michele sduai bela bisi ati ngau pangan diri tang malu ka madah laban enda lama aja bekelala. Nya meh ko urang nyema udah petara ngatur pandak ni masa bekelala asai ke panjai meh nyema indu tau ka laki nya sigi amat empu kitai.

Pengudah nya dia meh Igat nganjung Michele pulai ke rumah ya. Enda bangat jauh ga rumah Michele mina dalam kandang 30 minit ari pasar. Datai din Igat angkat muka ke Michele pintu enda berasai jari bepegai enda berasai jantung nyau tetengut munyi lagu embat la la. Tussah amai enti pengerindu nanggam dalam dada amat beserara enda lama asai ke setaun meh taja sama menua tang jarang betemu amat bendar lelenggau ke pangan diri. Enda berasai dia Igat bejaku

‘ Michele..amat malam tok tua begulai makai enda lama tang tussah amat aku ngemula ke ati aku empu. Enti nadai penanggul nadai aral melintang sigi ditanchang aku tali pengerindu tua taja enda lama bekelala aku amat sayau ke nuan dara.’ Pia ko Igat

Michele enda tesaut ke jaku orang bujang ba mua ya. Asai ke ka nyerauh gaga Michele ninga jaku Igat tang ulih ga ditan ke Michele. Begadai Michele ngelepas ke jari ya bejalai gegadai nuju pintu rumah sebedau Michele tama sempat Michele ngepai Igat. Enda berasai mulut tuchum manis enda berasai ati gaga enda berasai nyeling ke belakang meda urang ke disayau mupuk mina ayas belakang kerita Igat aja dipeda Michele. Bendar bala kaban serumah ngau Michele meda ulah ya bangat nyelai amai malam nya nyau ditundi sida ya tudah Michele. Pemuas betundi dia meh Michele nusi ya kati ya betemu ngau bekelala ngau siku laki benama Igat.

Benung Igat deriba mupuk mulai ke diri nyau rindang tudah ya ninga lagu dipasang DJ ba radio. Lagu jai nyadi manah meh didinga tussah amai ga penyakit pengerindu tok utai jai nyadi manah meh nyau enda berasai ujan lebat dilaban Igat mulai diri ke rumah. Jai bakani jalai enda meh berasai deriba tang amat Igat berasai gaga malam nya enda Igat berasai urang bisi merati ke ulah ya.

Benung Igat deriba dia Igat meda bisi ayas urang duduk ba bangku belakang ya tang enda ga Igat peduli mina numpu ke mata ya ba jalai aja. Benung ka tama dalam simpang rumah panjai sida ya dia Igat tepeda baka ayas siko indu ba ke ngepai ya ari jauh tang enda ga Igat peduli mina dalam untak ya Michele aja.

Sepengalama Igat ngau Michele bepangan nyentuk ke 2 bulan udah nanggam pengerindu dia meh Igat ingin amat ka ngambi Michele nyadi ke bini ya. Duit dikumpul udah ga cukup nyau pedis pala Igat ninga apai indai ya nanya kemaya ya bebini nyau udah lengkap utai disedia ke bala apai indai ya semina nganti Igat ngemai indu aja. Ngau pengering ati dia meh Igat mai Michele betemu awak ka ya ulih nanya Michele nyadi ke bini. Benung bejalai kediri ba pasar Igat ngiga kedai emas ngiga tincin diberi ngagai Michele tincin ke ulih ngikat pengerindu seduai ya.

Malam nya Igat telipun ngagai Michele ya deka betemu ngau Michele laban bisi utai ka dipadah ke Igat. Michele enda ga nemu nama kebuah Igat ka betemu ngau ya . Mupuk meh Igat gegadai ari rumah nuju endur Michele keja. Benung tudah Igat ngejang ngagai bandar dia Igat meda siko indu duduk ba belakang kerita ya.

‘ Kini nuan wai? Legi aku nganjung nuan’ pia ko jaku Igat. Igat nemu sida serumah selalu numpang Igat nyema ke pasar nya meh Igat mina betanya penungga pejalai indu nya tang enda ga indu nya nyaut semina nunjuk ke endur ya aja. Igat enda ga bejaku mayuh mina med ulah indu nya aja. Dia Igat nyeling ke belakang meda indu nya ngena baju bechurak burak ngau megai bup ba jari kiba ya.

‘Nama aku Monika. Aku meh empu bup ke tinggal ba kerita nuan sarinya.diatu ku ka ngambi ya pulai nasit ga nuan enda muai ya’ pia ko indu ke benama Monika nya. Igat mina enda bejaku mina deriba aja laban dalam ati ya din semina Michele aja mina siko indu nya aja benung bemain dalam runding Igat.

‘ Igat…nyema nuan minta tulong pegila lusa kangau aja nama aku dia aku sigi datai nulong nuan laban nuan udah nulong aku’ pia ko indu ke benama Monika sebedau pansut ari kerita. Igat mina naggun kepala aja maya Igat ka nanya indu nya baru dia mina asai ke sepu angin aja nyau nadai peda agi ayas indu nya semina bau aja agi tinggal dalam kerita Igat.

“ Laju ga indu nya belajai nyau enda peda agi” pia ko runding Igat. Begadai Igat mupuk nerus ke pejalai ya ka betemu ngau siko indu dara ke selalu bemain ba runding ya indu ngasuh ya selalu bemimpi manah tiap malam ngasuh ya kering semangat.

Hai baby..enti nuan udah badu keja legi mesej agai aku diatu aku benung dalam kerita nuju nuan bisi utai amat penting ka perandau aku ngau nuan, pia ke mesej terima Michele. Enda berasai Michele tuchum kediri meda mesej nya nyau bendar Michele nyeling jam ba dinding tussah amat ga jam nya maya kitai ka betemu ngau sulu ati nyau lubah amai bejalai baka ke abis bateri nyema seminit asai ke sejam nganti nyau lembau ka gawa laban ati ngau runding sigi udah pansut ari tubuh nganti ka betemu ngau sulu ati sulu dikerindu.

Datai ba sepital endur Michele keja, Igat alu engkah kerita ya sepiak pondok sepital dia meh Igat pansut nilik jam ba jari empai ga pukul 10 asai ke ngau engkisit jarum jam. Dia meh Igat nganti Michele ambis keja duduk dedeunga ba pondok merati ke senaya malam amat manah terang bulan kebelik bintang deru angin lelubah nyepu tubuh Igat. Benung Igat merati ke rampa menua dia telipun binching ya alu bebunyi

“ nuan……..meruanku sayau…nuan aku rindu…” pia ke bunyi telipun Igat ngau lengkas ya nyaut begadai bejalai duduk ba mua pintu sepitak endur Michele keja.

‘ Helo ucak nama nyadi program malam tok?’ pia tanya nyawa orang dalam telipun nya

‘ Nyadi anang irau nuan aku semina nganti Michele pulai keja aja. Udah aku berunding ngau panjai ucak sigi deka ambi aku ke bini Michele malam tok ucak.’ Saut Igat

‘ Nya baru ya…anang irau nuan ucak tok kaban nuan agi bisi ditisi nuan semampai nulong tok tang kati ke nuan ka madah ke Michele legi deh? Maya nuan nyua ke tincin nya ukai indu ka sua ngapa enti enda nuan melamar ya pia ko orang diatu hahaha..meja udah ga sedia ucak udah aku bookin ke nuan tadi akai enda sabar ka ngansar ke kaki tok hahahah’ pia jaku Nil.

Cukup jam badu gawa dia Michele alu berumban mansut kediri bejalai nuju pintu dia ya tepeda ka siko laki benung bejaku ba telipun. Begadai Michele bejalai nuju Igat ke benung kisuk bejaku ba telipun dia meh Michele ninga utai diperandau ke Igat ngau Nil asai ke enda pecaya ya jaku ke pansut ba mulut Igat. Asai ke bemimpi Michele ninga jaku Igat.

‘ Nya meh utai ke benung runding aku tok ucak legi pengudah ya pulai keja anjung ku pulai dulu ya ngasuh ya mandi dulu udah semua tembu baru aku ngambi ya baru. Enti baka runding aku sigi bai ku kia ya makai ba kedai nya semina aku ngau Michele aja. Tinchin udah ga sedia ke aku laban ketegal Michele meh aku sanggup melutut ba mua ya nyerah ke tinchin ngagai ya ngau nanya ya ulih ke aku ngambi Michele nyadi bini aku nyema ya setuju nuan meh orang keterubah nemu ucak awak nuan alu ngesah ke tua ya ditu hehehe..’ panjai ga jaku Igat madah ngagai Nil.

Michele mina tuchum ninga jaku Igat sapa enda tuchum nyema laki ka melamar indu ka ngambi indu dikesayau nyadi bini nyadi orang ke idup sekunsi sampai jemah ila dia meh Michele nemu utai kea mat penting ka padah Igat ngagai ya mina petara aja nemu pengaga indu dara nya enda berasai dia Igat alu malik ke belakang alu tepeda ke Michele udah cecegit ba belakang ya. Igat mina tuchum meda indu dikesayau ya ba mua ya

‘ Nama utai ke ka diperandau ke nuan ngau aku legi?’ ko tanya Michele ngaga diri enda nemu. Nasit ga Michele nemu amai ngelalai ke juluk ati diri taja ya nemu program Igat tang Michele ngetat ke pengaga ati diri. Enda berasai jari Michele dipegai Igat mina petara aja nemu perasaan seduai ya. Igat mina tuchum aja meda Michele

‘ Legi meh aku madah auk? ‘ pia ko Igat

‘ Padah diatu aaa…enggai aku geng nuan legi’ nyau baka ke ngugut Michele

‘ Anang irau nuan baby legi ku madah auk diatu enggai nyadi ku ka madah laban nuan bedau ga mandi baru pulai keja eee..bau tau hahaha’ pia tundi Igat

Michele alu ngaga diri ringat nyau muncung mulut ya ninga jaku Igat sigi bakanya ga indu nyema ngau pangan dikesayau selalu ka ngaga diri ringat tang ringat enda lama.

Datai ba rumah Michele nurun ari kerita ngelawa pagar rumah ya

‘ pukul 10.30 legi ku ngambi nuan baby..em..baby aku sayau amat ngau nuan’ pia ko jaku Igat murus begadai kuyu Michele.

Pengudah nya Igat begadai mupuk ngena kerita nuju ngagai kedai ke udah bookin Nil dia Igat tepeda Nil megai bungai ngau kad bechurak merah. Nyau rerising Nil meda Igat datai nuju ngagai ya alu betabi ngau Igat

‘ Semua udah sedia ucak..nganti penatai orang ke disayau nuan aja agi. Legi aku nganti seduai ba mua pintu ucak..anang irau ucak aku nyadi pelayan seduai malam tok udah aku madah ngau tokey kedai tok tadi akai enda sabar ka muka sepucung dua ucak hahaha’ pia ko Nil madah ngagai kaban ya. Nasit amat ga tokey kedai nya sporting nemu utai dikedeka Nil ngau Igat

‘ Nil..nuan meh kaban aku sampai jemah ila gaga amai aku bulih kaban baka nuan selalu nyukung aku ari belakang. Anang irau nuan kaban nuan meh orang keterubah ngau tua legi nya aku ngasuh nuan nyadi pelayan awak nuan empu meda aku melamar ya awak nuan nemu indu ke ka diambi aku nyadi bini. Nyema nuan bisi nyamai ga ati aku nyua ke tincin ngagai Michele nyau gegetak jari tok kaban hahaha..’ pia ko Igat. Nil ngau Igat alu bela ketawa meda ulah pangan diri.

Pengudah datai ba rumah Michele majak tuchum kediri bejalai nuju ngagai bilik ya. Dia meh kaban serumah ya meda ulah Michele nyelai amai baka ke orang kena tiket nyau enda berasai nanya meh sida ya ngagai Michele. Dia meh Michele madah ke sida ya sekaban Igat ka ngambi ya nyadi ke bini nyau begau sida serumah beberap ngau pangan diri nyema kaban udah ke belaki bebini sigi ngau gaga bala kaban. Nya meh ko orang kaban amat kaban tussah ka ngiga laban kaban keamat nyema kitai tussah tau ke senang sida ya sigi bisi ba tisi.

Nyau baka salon sida ya ngadu ke Michele

‘ Tok baju kena nuan legi awak ka Igat enda ulih bejaku meda pemajik nuan legi’

‘ Kitu nuan Michele aku nulong ngaga buk nuan awak Igat enda malik ngagai indu bukai mina meda nuan aja malam tok’

‘Michele…malam tok malam seduai aja anang ngasuh utai bukai ngacau menghalang seduai ingat Michele malam tok malam nuan bakal nyadi bini orang’ mayuh macam jaku tundi sida sebilik ngau Michele nyau enda berasai merah kuyu tudah Michele tundi bala sida sebilik.

Amat ngumba endar ga jam baka ke ngai nunjuk ke numbur ba tisi gegetak aja nyau baka ke enda engkisit peda Michele. Asai ke mimpi Michele malam tok penudi ya dikangau indu dara bendar amat Michele ngarap ke nadai penanggul malam tok laban malam tok Igat ka ngambi ya nyadi ke bini.

Cukup jam dia meh Igat mupuk ngambi Michele dalam ati asai ke tetakut bisi irau bisi enda ibuh sema jari nyau gegetar celap ukai celap ketegal ekon tang celap laban malam tok meh Igat ka melamar indu dara di kesayau ya indu dara peragam ati Igat. Enda berasai Igat nekan minyak kerita nuju rumah Michele.

Benung kisuk deriba dia Igat tepeda ke ayas indu duduk ba belakang kerita ya. Indu nya mina merati ke ulah Igat meda ngau mata tajam meda ngau mata begedi nyau takut Igat meda mata indu nya.

‘ Igat…sapa nama indu ke deka diambi nuan nyadi ke bini? Uji nuan nulis nama ya ba bup tok seduai sigi jadi ila’ pia ko indu nya nyerah ke bup bechurak biru ngagai Igat. Dia Igat tepeda ke nama orang dalam bup nya puas Igat merati Igat tekenyit laban tepeda ke nama siko mensia kala didinga ya. Bendar amat Igat ngingat ke endur ya meda nama orang nya nya lama Igat berunding. Pemuas berunding dia meh baru Igat ingat nama orang ke peda ya tadi nama Ricky ngau Monika baru Igat nemu dua nama nya nama orang ke udah mati suba.

Dia Igat nemu sapa meh indu ke nepan kerita ya sarinya Monika indu ke nyadi mangsa bunuh suba indu bepangan ngau Ricky dua iku mensia ke udah ngejang pegi dua iku mensia ke nyadi bup nagih danji ke digaga anak mensia maya bepangan. Brunding meh tudah Igat nemu meh Igat nama ke ditulis ba bup nya amat ba dalam bup nya madah ke sida ya udah jadi tang ukai jadi ba menua nyata tang jadi ba batang mandai baru meh Igat nemu indu nya sigi ka ngambi nyawa ya aruh bup ya ba dalam kerita ya nya semina umpan awak ka Igat nulis nama ya ngau Michele ba dalam bup nya. Nasit Igat bedau nulis nama seduai ya dalam bup nya nyau lubah Igat deriba kerita deka ngiga buah runding kati ka ngelepas kediri ari indu nya. Sebedau Igat ngaga nama-nama dia Igat sempat nulis mesej nuju Michele ngau kaban ya Nil.

Enda berasai kerita ke kena Igat nyau baka ke deriba kediri enda mukai-mukai datai lori alu ngelantak luan kerita Igat alu tepelanting ari kerita nya terempas ba tisi jalai. Nyau pandak seput tudah Igat enda Igat nyangka malam kea mat penting ngagai ya nyadi malam ke mutus ke seput ya. Sebedau mutus ke seput dia meh Igat alu bejaku

‘ Nyema nuan orang empu bup nya ngasuh aku ngau ya begulai sejalai nyadi melaki bini aku minta tulong nuan’ pia ko Igat nyau baka nama darah pansut ari mulut Igat.

‘ ulih aku nulong nuan tang nuan mesti nulis nama indu nya dalam bup tok’ pia saut indu nya ba mua Igat ke benung ngetan ke nyawa diri empu.

‘ Nyema nuan ulih nyambung seput aku enda lama awak aku ulih nulis nama ya dalam bup tok….aku.enda nemu nama..amat ya’ ko Igat nyau seleka-seleka jaku Igat.

‘ulih aku nyambung seput nuan tang semina enda lama aja udah nuan nulis nama indu nya dia meh aku mutus ke nyawa nuan’ pia jaku indu nya alu nyerah ke bup bechurak biru ngagai Igat. Pengudah nya indu nya alu lesap dia Igat asai ke kering baru begadai angkat bejalai nuju ngagai rumah Michele nyau nadai agi bekau telih ya ba tubuh.

“ Lama amat ga Igat tok nyau penat kaki aku nganti laki tok” pia runding Michele benung nganti Igat ba mua pintu. Ya enda lama nyenguk ba jendila merati ke Igat udah datai ke bedau pemuas angkat duduk merati ke ba luar nyau mayuh mesej kirum Michele ngagai teliupun binching enda ga dibalas Igat. maya Michele kol Igat enda ga ulih

“ engka nadai line kini tau ka Igat benung mupuk kitu” ko runding Michele nyelap ke ati diri empu. Benung Michele merati ke pagar rumah ya enda berasai mua ya dipuput rebut lelubah kena kuyu ya dia Michele ngasai ke lain amai ati ya asai ke bisi utai nyadi tang ulih ga ditagang ya nya becampur perasaan nya sinu bisi ga. Ari jauh dia Michele meda ayas siko laki bejalai gegadai nuju ngagai pagar rumah ya

Tekenyit Michele meda siko laki amat dikesayau ya bediri ba pagar rumah nya ngena baju kot megai bup bechurak biru semina tuchum nganti Michele. Amat sigat Igat peda Michele ngena baju kot nya nyau labuh ati Michele meda Igat. Ngau lengkas Michele angkat muka pintu alu bejalai nuju ngagai Igat.

‘ Laun ga nuan datai lama udah aku nganti nuan ari tadi. Ni kerita nuan deh?’ pia ko Michele

Igat enda nyaut semina meda mua indu ke disayau ya ba mata ya. Enda berasai labuh ai mata gegadai nurun ba kuyu Igat enda ya nyangka malam nya meh malam penudi ya meda orang dikesayau ya. Bendar amai ya ngetan ke ai mata nyau majak pansut semina petara aja nemu penusah ati penusah nuntung Igat jai amat ga nasit enggai ngasuh seduai ya begulai. Gegadai Igat bejalai nuju Michele begadai Igat murus kuyu Michele. Michele enda memunyi meda ulah Igat nyelai amai engka Igat gaga laban ngempu Michele pia ke runding Michele tang Michele enda nemu orang ke disayau nadai masa agi begulai ngau ya.

Bendar amat Igat ngetan ke ai mata ya bendar amat Igat ngetan ke ati ya majak sinu

‘Baby..nangka tuk aja tua ulih begulai….’ Enda sanggup Igat nerus ke jaku ya nangka penyinu ati ya meda Michele

‘ Nama deh? Tadi nuan madah ka ngambi aku nyadi ke bini diatu nuan madah nangka tok aja tua begulai nama salah aku? Aku udah sedia nyadi bini nuan nama ga nuan ngaga aku baka tu? Aku amat-amat sayau ke nuan sampai ati nuan ngaga aku bakatu nama salah aku? Nama salah aku ba nuan Igat?’ enda berasai Michele ninggi ke nyawa madah ngagai Igat

Igat alu merap Michele nyau enda berasai ai mata Michele labuh dia Michele ngasai ke tubuh Igat celap amat asai ke merap bangkai

‘aku amat sayau ke nuan tang….angka nasit enda ngasuh tua begulai..’ ko Igat meda mua Michele. Begadai Igat ngelap ai mata nyau nerutu ba kuyu Michele. Michele mina tebelenga meda ulah Igat nyelai amat jari Igat ke murus kuyu Michele celap amat Igat mina tuchum pait merati ke Michele indu kea mat disayau ke Igat.

‘ Tusah aku ka madah ke nuan…sayau amat sayau tang seput aku bangat pandak kumbai aku ulih begulai sejalai selama ya nemu nya mina setengah jalai aja…’ tussah amai Igat ka nerus ke jaku ya.

‘ Baby…giga meh nuan orang baru orang ke ulih sayau ngagai nuan baka aku giga meh nuan orang semampai ba tisi nuan belama..baka aku diatu semina semengat aja meh ulih ba tisi nuan…mupuk dulu aku baby..ngarap ke nuan bulih orang manah agi ari aku anang irau nuan aku semampai sayau ngagai nuan selama-lama ya’ pia ko Igat alu ngelengka ke jari Michele begadai surut nguing ke belakang mupuk bejalai gegadai.

‘ Igat….Igat…anang ninggal ke aku ..’ ko Michele ngau sesabak teduduk meda laki kedisayau ngejang bejalai ninggal ke Michele

Dia Igat tepeda ke indu benama Monika ba mua ya Igat alu nguing meda Michele enda berasai Igat ninggi ke nyawa ya

‘ ANANG NGIGA AKU AGI DIK…TUA UDAH NADAI NAMA-NAMA AGI..NANGKA TUK AJA TUA BEGULAI..AKU BENCI MEDA NUAN..BENCI MEDA NUAN..!!’ ko Igat mupuk bejalai ninggal ke Michele

Nyau nerutu ai mata ba kuyu Michele ninga jaku Igat bakanya, nyau asai ka padam seput ninga jaku pansut ari mulut laki ke sayau ngagai ya selama tok laki ke dikerindu ya selama tok laki selalu ba tisi ya ngelama tok. Michele belanda tama ngagai bilik ya ngau sesabak nyabak ba atas katil semina petara aja nemu bakani asai ati Michele. Bendar amat ya nyabak nya begau bala kaban sebilik ngau ya meda Michele dia meh semua sida ya nyuba ngaum Michele.

‘ Igat…nama salah aku…sampai ati nuan ninggal ke aku..’ pia sada nyawa Michele semua gambar Igat peda ya memagang nyau enda berasai Michele tetinduk dibai kelalu tussah ati.

Pengudah nya Igat ngelawa endur ya tadi indu nya semampai nitih Igat ari belakang

‘nama pengawa nuan enda nulis nama indu nya tadi? Ulih seduai begulai sejalai’ ko indu nya

‘ Nama nuan nadai pending..aku ngau ya udah putus’ saut Igat ngau nangka pemedis ati

‘ Tulis meh nama ya dia….’ Pia ko indu nya

Igat ngambi darah ya nulis nama nya ngau nama siko indu ukai nulis nama Michele tang nulis nama Monika

‘AKU NGASUH NUAN NULIS NAMA INDU NYA UKAI NAMA AKU..MATI NUAN IGAT’ ko indu nya

Dia Igat meda siko ayas laki ba mua ya nyekak indu ke benama Monika

‘ Seduai udah nulis nama pangan diri dalam bup tok aku datai nagih danji seduai begulai sejalai selama ya’  ko laki nya. Gaga meh ati Igat laban ulih nyelamat ke nyawa orang ke disayau amat nyawa diri empu padam.

Pagi nya benung Michele angkat dani dia ya tepeda ke darah ba jari ya puas Michele berunding darah sapa ke lekat ba jari ya dia ya meda siko ari kaban ya sebilik datai madah ngagai Michele Igat udah nadai ketegal siden malam tadi. Nyau teduduk Michele ninga berita nya dia meh Michele berunding baru ya nemu nama ga ulah igat nyelai amai malam tadi enda berasai Michele meda telipun ya alu tepeda ka mesej ba telipun binching ya

‘ Baby ku Michele…aku minta ampun ngagai nuan laban seput aku enda panjai laban nasit tua enda panjai begulai ditu aku ka madah nyema aku nyelai ulah betemu ngau nuan legi ukai nama aku ngaga bakanya aku enggai nuan nerima nasit sama ngau aku amat pedis aku ka medis ke ati nuan laban nuan meh indu amat-amat aku sayau semina meda nuan enda lama udah puas ati aku sulu…nyema seput aku padam semengat aku ga ngundang nuan belama..nyema nadai nasit begulai ba dunya injau ba sebayan ga aku nganti nuan terima kasih ngagai nuan Michele laban meri aku peluang sayau ke nuan selama tu taja enda lama’ ari Igat…

Nya baru Michele nemu semengat Igat datai ngundang ya malam tadi awak ke Michele nemu penalam penyayau Igat ngagai ya enda berasai ai mata labuh niti kuyu Michele kuyu Michele ke selalu dipurus disium Igat ngelamatu semina bau Igat aja agi tinggal semina gambar Igat aja nyadi pengubat rindu Michele. Benung Michele nyabak ngenang nasit Igat ngau nasit diri dia Michele nyau angkat gegadai nyenguk ke luar rumah ari jendela. Dia Michele tekenyit tepeda ke siko laki besai amai tubuh megai bup bechurak biru nyau teritik darah pansut ari bup nya. Ukai baka mensia semina tubuh aja mensia tang pala ya baka uduk nyau merah mata ya meda Michele taring nyau pansut merati ke Michele sebedau ya lesap lakinya sempat nunjuk ngagai Michele semengat Igat dipegai ya ba rekung nyau rerising lakinya nyekak semengat Igat baru ya lesap nadai dipeda agi…