CHAPTER FOUR (A FRIEND)

Pengudah 3 taun belajar ba kolej dia Yick ngumpul bup lama ya ngau bup ke enda diguna ya. Mayuh amai bup ngumpul tudah ya. Nyau 2 plastik besai. Dia Yick mai plastik nya ke beresi bup engkah ba luar hostel ya. Pemayuh bup ke enda diguna nangka pemayuh. Benung Yick meresi ke semua endur ba bilik ya dia ya meda bup bechurak biru. Gegadai ya ngambi bup nya.

“ buai aja bup tok nadai guna aku nyimpan ya” pia ko Yick alu muai bup nya begulai ngau bup ke bukai. Pengudah tembu ngemas bilik Yick merati ke bilik sida ya sebedau ya mupuk pulai ke menua. Memacam pengingat bemain ba dalam pala ya. Pengingat ke enda ulih buai ya pengingat maya ya bekelala bekaban ngau Jay suba. Enda berasai neritik ai mata ngenang niang kaban rapat ya nya. Kelalu pandak nyawa tudah Jay. Kelalu singkat seput tudah Jay. Begadai Yick nutup pintu hostel ke endur ya diau selama 3 taun. Begadai Yick mupuk mai beg ya tama dalam lif. Angka sekali tok ja meh Yick meda endur ya bekelala bekaban ngau Jay.

Pengudah Yick mupuk dia bup bechurak biru agi dalam plastik. Bup ngembuan danji orang ke benung bepangan. Bup ke ngamat ke danji orang benung nanggam pengerindu. Bup ke selalu narit ati orang meda ya. Bup ke selalu mutus ke nyawa orang ke mungkir danji.

‘ Sapa muai bup memanah tok? Sayau bup tok buai pia aja aku ngambi bup tok nadai meh orang nemu’ pia ko Umek . Nyau baka orang ke enchuri ulah Umek ngambi bup bechurak biru ngelalai ke bup nya dalam baju ya. Pengudah ngambi bup nya Umek bejalai laju takut orang meda ulah ya nuju ngagai rumah sewa ya. Umek pelajar baru ba kolej endur sida niang Jay belajar suba. Peninggi Umek sama ngau Jay semina pisin bok aja lain ari Jay. Tang ulah Umek jauh bebida ari Jay. Taja gamal sigat Umek siko orang selalu gila indu tauka dikangau ‘playboy’. Taja pia Umek ngembuan ati tik manah enda kala mantah nyema indu ka ke ya. Nyema bisi indu ka ke ya Umek nerima aja.

‘ Appuu baru datai nuan ucak? Anang balat ngayah ke anak orang’ pia jaku Key ngagai kaban sebilik ya.

‘ Ya ga ka deh cak ngai jadi nulak rezeki hehehehe’ saut Umek ngau ketawa. Key mina meda ulah kaban ya nya. Pengelama seduai sebilik enda alah kira pemayuh indu udah begulai ngau Umek. Ni indu iban indu melayu ngau indu cina enda ibuh kira bangsa bukai bai Umek bemalam dia. Nyema Umek mai indu pulai tindok ngau ya Key selalu aja tinduk ba ruang tamu. Laban Key nemu ya sigi enda ulih tindok ninga ulah gaga Umek. Enti nyema pangan Umek empu enda ga ngawa tang Key ngai masuk campur hal orang ngai ke kumbai orang ‘busy body’ ga ya. Nyema pangan Umek praktikal tauka cuti pulai ke menua dia meh Umek nunjuk ke ulah bangat enda menuku. Berapa kali Key  madah ngingat ke ya tang enda kala di ibuh ke Umek.

Kadang-kadang kasih ga Key meda pangan Umek. Selalu kena tipu. Nyema Umek begulai ngau indu lain Key meh nyaut bemesej nganti Umek. Kadang-kadang berunding ga Key nama ga umek sampai ati ngayah ke pangan ya. Angela nangka pementas indu. Tambah mega Angela kelalu pecaya ngagai jaku Umek. Sigi ga kelebihan Umek pandai amat mujuk indu besumpah ba mua indu ngelayan indu ngau nguntik indu. Jauh amat beda Umek ngau Key. Umek ukai datai ka belajar tang datai ka ngerusak ke indu ba kolej nya. Semua indu ke kala begulai ngau ya ditulis ya ba bup mit dilalai ke ya ba dalam beg ya ngai ke ditemu pangan ya Angela.

‘ ucak nulong aku lok nuan. Mesej ngau Angela lok auk ka diting ku legi.’ Pia ko Umek benung megai telipun binching ya alu nyua ka telipun ngagai Key. Key enda memunyi mina meda telipun Umek nya tang enda ga ngambi ya.

‘ cak, ngai aku bakatu agi cak. Enda kasih nuan meda pangan nuan nya. Udah ga bajik mentas tambah ga pecaya ngagai nuan. Sayau nuan ngayah ke ya cak. Nyema nuan ngasuh aku malas mesej ya ngai ku cak pegila bisi test aku dah ga aku ka belajar legi’ pia saut key.

Umek mina meda kaban ya nya. Baru ya ingat pegila bisi test tang Umek sekumbang mula belajar ba kolej ya nadai kala belajar. Ka agi Umek belajar nguntik indu ngetest ngiga ayat bebungai kena ngulih ke indu. Umek duduk sepiak Key meda key benung belajar. Dia Umek enda bejaku semina merati ke Key.

‘ enda ngawa ga cak. Ngai aku ngacau nuan belajar. Pegila ngupi nuan aku auk? ulih meh auk? ila ku melanja nuan KFC ga….kasih kaban nuan tok’ pujuk tudah Umek. Key tuchum meda kaban ya. Ari suba Umek semina ngupi ari Key. Semua assignment beri bala pengajar semua kupi ari Key. Key ngai ga meda kaban ya kena buai ari kolej. Ketegal kaban meh Key selalu nulong Umek.

‘ Ucak…enti Julia datai legi madah ke aku auk? Ulih ga ngangat ke isi malam tok hehehe’ pia ko Umek. Key mina naggun ke pala aja laban benung kisuk maca nota diberi pengajar. Umek tama ke dalam bilik. Bendar amat Umek nyembur bilik ngau minyak wangi ngai ke ditemu orang nginsap. Nyau beberus ngeli tudah tuai ka muai bau insap.

Tok! Tok! Tok! Munyi pintu diketuk orang. Key angkat begadai muka pintu. Dia Key tepeda siko indu ngena  baju tinduk kaler burak megai anak patung. Nyau tepeda betis ngau pah ya nangka pemurak. Pelu-pelu pemurak mua indu nya enda mantah baka artis jipun. Buk panjai datai ba belakang tuchum malik ngagai Key. Key ngelala indu nya. Julia indu sama kos ngau ya. Indu sama kelas ngau ya.

‘ Key…nuan sebilik ngau Umek pia? Enda nemu aku selama tok. Sory auk ngacau nuan. Umek bisi ka?’ tanya Julia malu-malu tekuyung. Key mina nunjuk ke Umek bisi dalam bilik. Begadai Julia tama dalam bilik ngiga Umek.

‘ cak ulih aku ngambi tilam ngau pangal aku lok? Tinduk ba luar aku legi’ pia ko Key tama alu ngangkat ke tilam ya. Ngai nyadi key tinduk begulai ngau seduai Umek ngau Julia dia. Enda nyamai ga kitai ninga munyi orang sepiak kitai baka nama tang kitai tinduk kediri ngetat ke diri. Nyamai agi tinduk kediri amat ulih tinduk nadai ninga utai. Utai tik ngasuh ati tenguk ka ngau. Tang ukai nama Key ka tinduk luar laban pukul 3 pagi Key sigi udah angkat belajar. Sigi bakanya jadual Key sepenglama ya udah belajar ba kolej nya. Sigi nadai runding bukai laban key nemu apai indai ya nganjung ya kitu ukai ngaga ulah enda menuku tang ngasuh ya belajar ngiga pemandai. Ngangkat ke nama apai indai ya laban Key aja anak tik dikesayau apai ngau indai ya. Tambah mega Key nya anak tunggal.

Jam nunjuk ke pukul 10 agi meh Key balajar. Key angkat ngaga ai kupi.

“ Ngetu lok belajar nyau pedis untak. Nyamai ku ngirup kupi dulu” pia runding Key. Dia Key ngirup kupi meda keluar jendila. Dia ya tepeda ka bulan kembung nangka pemanah. Sinu ati meda bulan nya. Asai ka pulai ke menua tang ngai nyadi laban pelajar ya empai abis. Dia meh Key duduk nunga bulan meda bala remang ngasai ka tiup angin malam.

Tok! Tok! Tok! Ngau begetar pintu ketuk orang. Nyau tekenyit tudah Key.

‘ Sapa meh datai malam-malam bakatu? Sapa nya?’ tanya Key bejalai ngelawa pintu alu muka pintu. Nyau tekenyit key meda siko indu buk betancang belakang ngena skirt biru baju sempit panjai lengan tuchum ngagai ya. Indu nya nangka ya pemajik pemurak nyau enda salah baka bulan ke peda ya tadi. Angela baru atai ari praktikal ngiga Umek. Dia Key nyau enda memunyi. Ka ya bejaku nyau enda tepansut ke jaku laban ya nemu Umek benung ngau indu lain ba dalam bilik. Nyau begaru pala tudah Key.

‘  Ni Umek nyau lelengau lama enda meda sulu ati aku nya.’ Pia ko Angela alu tama ke dalam bilik.

‘ Eeeerrrrr……emmmm......akai…..tumu ga nuan pulai praktikal?’ pia ke Key ngelimpang ka jaku

‘ Aku nemu Umek ba bilik laban ku bisi meda kasut ngau selipar ya tadi….ni ya? Legi meh ku ngiga ya hehehehe lama amat enda betemu ngau sulu..’ pia ke Angela. Ngau lengkas Angela  muka pintu bilik. Enda berasai pintu nya tebuka. Dia Angela tepeda ka Umek. Umek benung begulai ngau indu bukai. Nadai bebaju nyau benung beberap. Umek tekenyit meda Angela bediri ba mua pintu. Angela mina merati ke ulah seduai ya. Nyau gegetar tubuh Angela meda utai bakanya. Asai deka padam seput. Enda ya nyangka selama tok Umek nipu ya. Enda ya nyangka Umek kumbai ya selama tok amat sayau rindu ngagai ya nemu nya ngaga ulah tik bangat medis ke ati ba belakang ya. Enda berasai ai mata labuh meda utai bangat medis ke ati. Angela alu mutar ke mua belanda nuju pintu ngau sesabak. Nangka pemedis ati indu dara nya. Key mina enda memunyi.

Umek alu angkat ngagai Angela. Tang Angela laju amai belanda tama dalam lif mupuk ngagai bilik ya empu. Nyau tekenyit bala kaban Angela meda ya belanda ngau sesabak.

‘ Apu..enda aku nemu Angela pulai saritu. Akai tok gerenti putus tok pegila’ pia ko Umek bejaku ngau nungkun insap. Lama Umek narit asap insap baru ya ngelepas ke asap insap nya pansut ari idung ngau mulut ya.

‘ Cak, ari suba aku dah madah…kasih Angela gaga nuan baka nya. Pegila pujuk nuan meh ya kasih ya nadai nuan tetemu ke indu mentas baka ya nya ila. Berunding meh nuan cak’ pia ko Key bejaku nunga Umek.

‘ Enda ibuh meh cak indu ukai ya siko..mayuh agi indu manah ari ya pegila bulih meh aku lusa bulih meh aku kada enda manah agi ari ya.  Sigi ari suba ga aku ka putus ngau ya tang takut ya enda ulih nerima legi tusah ga indu ukai ulih nerima pun nyema kitai madah ka putus. Nyema nuan ka cak ambi nuan ga ukai selalu tua begulai. Boring ga selalu begulai ngau indu yang sama aja nyamai masang mayuh spare.’ Pia saut Umek. Kempang amat Umek madah pia. Nyau baka ke enda peduli ke Angela Umek tama baru dalam bilik.

‘ Nadai nama-nama nya sayang salah faham ja. Enda ibuh kiruh ke nya tua auk sayang’ pia ko Umek alu megai jari Julia. Julia mina nitih ke jaku Umek. Baka ke kena jayau Julia nitih ke jaku Umek aja. Key mina enda memunyi. Ka ya masuk campur enda ga kempang ati mina meda aja meh tudah Key. Kasih ga Angela nyau nangka pemalat Angela nyabak malam nya. Baka ke bini mati laki.

‘ Umek aku ke kedai dulu ka meli tapau lapar mat tok. Nuan ka? Legi ku tapau ke nuan ga’ pia ko Key ngetuk pintu bilik.

‘ Tapau ke aku mee goreng basah legi cak. Legi ku mayar ngagai nuan ga’ saut Umek ari dalam bilik.

Key masuk ke baju celap pansut ari bilik nuju ngagai lif. Key nyau berunding meda ulah Umek kempang amat ngayah ke indu kulu kili. Nyema ukai kaban enda Key ka begulai ngau ya tang nya meh mula tama suba Umek meh kaban ke terubah ditemu ya nyau nyadi sebilik ngau ya. Penjauh pejalai ngagai kedai bisi ga 15 minit. Sebedau datai ba kedai bisi taman antara kedai ngau hostel sida Key. Benung bejalai dia Key tepeda ka Angela duduk kediri kekisik nyabak. Kasih amat Angela. Enda ya nyangka pemulai ari praktikal ya tepeda utai bangat ngasuh medis ke ati.

‘ Angela…nuan kediri pia? Kumbai aku sapa tadi.’ Pia ko Key ngelawa ngagai Angela. Ngau lengkas Angela ngendas ai mata ya. Taja pan tuchum tang ati nangka pemedis. Angela ngai nyabak ba mua Key. Taja Key sebilik ngau Umek tang Key nya meh kaban keterubah bekelala ngau Angela. Kaban ke selalu ba tisi Angela maya ya tusah maya ya senang. Enti Umek jauh sekali ka ngau Angela maya tusah maya senang. Kekadang Angela bejalai kediri laban Umek selalu madah diri empu mayuh keja. Sekumbang Angela bepangan ngau Umek Key nya meh selalu begulai ngau seduai ya maya bejalai ke pasar tau ka endur bukai. Sepenglama ba kolej Angela enda kala meda Key bepangan ngau indu bukai jauh ke agi diting ngau indu bukai. Key ke temu ya selalu diting ngau bup enti enda begulai ngau nota.

Key enda memunyi tang duduk sepiak Angela. Key mina merati ke bulan kembung ba langit.

‘ Maya aku tusah ati aku selalu meda bulan merati ke bintang. Udah nya nyamai ga asai ati’ pia ko Key. Angela nangkat ke pala ya meda bulan ba langit ngau Key. Seduai bela enda memunyi. Key nemu Angela agi tusah ati ketegal Umek.

‘ Angela nyema nuan tusah ati pedis ati padah aja ngagai aku ngambi nuan ulih muai mimit penusah ati nuan taja enda mayuh mimit nyadi meh. Ukai aku ka ngambi ulih ari utai tok tang nuan kaban aku keterubah aku datai ditu. Mina kaban aja nyukung kitai ditu laban kitai jauh ari apai indai. Ukai aku ka masuk campur hal seduai tang aku mina meri nasihat aja. Nyema nuan enda ulih ngelupa ke Umek nyamai meh nuan ngiga orang ke manah agi ari ya. Nyema nuan minta tulong giga nuan aja aku laban aku sigi nulong nuan’ pia ko Key. Enda mukai-mukai Angela merap Key alu nyabak ba dada ya. Key nyau tekenyit tang ngawak ka Angela muas ke ati ya muai penusah ati ya. Ari jauh Umek meda ulah Key ngau Angela.

‘ Nadai guna nuan Key. Nikam kaban ari belakang legi nuan nyepi ya enti pulai legi’ pia ko runding Umek nenggam jari.

Pengudah meli tapau alu ngajung Angela pulai Key mupuk ngagai bilik ya. Begadai Key muka pintu alu bejalai tama. Dia Key meda Umek duduk ba bangku nyau dengus-dengus nginsap. Wat baru pulai main futsal ngelawa bilik Key laban ka belajar ngau Key.

‘ Lama ga nuan napau mee nya. Tok napau ke benung beberap ngau Angela’ pia ko Umek. Key enda bejaku ninga kaban ya munyi nya.

‘ Key aku ngau nuan belajar legi kada aku udah mai nota tok’ pia ko Wat tama bilik Key. Enda mukai-mukai Umek angkat numbuk Key ba mua. Nyau labuh tudah Key ninggang bangku. Dia Umek nendang belakang Key. Nyau tepelanting tudah Key. Key nemu Umek meda ya ngau Angela tadi tang Key enda ngelaban mina ngetat ke abi kena tumbuk tadi. Dia Wat alu nangkap Umek nulak Umek ke dalam bilik. Nyau biru mata tudah Key kena tumbuk.

‘ Nadai guna nuan bekaban ngau aku. Nuan nya meh kaban makai kaban. nadai guna nuan nya’ pia ko Umek ari dalam bilik nya baka orang gila Umek. Majak numbuk pintu mangka ke kipas ba dalam bilik.

‘ Apuu anang pia nuan Umek. Pengelama seduai bekaban nadai kala Key bejaie nuan’ pia saut Wat

‘ Nuan anang masuk campur tok antara aku ngau Key. Madah diri kaban nemu nya makai didalam’ pia ko Umek nya kekutap ngetup ngeli.

‘ Nuan ke enda nemu utai. Ketegal nuan Angela nyau tusah ati. Nuan nya meh mensia nadai guna gamal ja sigat ati nangka penyai. Nuan nadai untak ngayah ke indu amat-amat sayau ngagai nuan. Enda nuan nemu selama tok Angela amat sayau ngagai nuan baka nama penyayau ya ngagai nuan. Kala nuan ngau Angela maya ya tusah maya ya senang? Nya aja peda nuan ba Angela mina tubuh ya aja. Kempang nuan ngumbai aku kaban makai kaban selama tok sapa selalu nulong nuan? Sapa selalu mujuk seduai maya belaya? Sapa selalu ngaga ke nuan assingment? Aku madah ke nuan nyema aku kaban makai kaban ukai bakanya ulah aku. Nadai kala aku meda bekaban ngau mensia nangka penyai ayi baka nuan mina ngulih ke tubuh indu kin kia. Selama tok sapa nulong nuan ari dibuai ari kolej ketegal mai indu ngagai hostel. Ingat nuan magang nya. Nyema aku jai enda aku ka nulong nuan selama tok’ pia saut Key. Nyau enda memunyi Umek. Dia meh ya nemu kaban ya Key meh selalu nulong ya selalu ba tisi ya maya tusah.

Tumu pagi Key angkat alu ngadu ke peninduk ya. Umek bedau ga dani. Tambah mega Julia bedau ga pulai. Taja malam nya Key ngau Umek belaya tang Key ngai kiruh ke nya agi. Dia Key ngerak Umek laban saritu bisi test. Udah nya Key mandi sebedau ngirup nurun ngagai kolej. Dia Key dedunga nganti bas kena ya ngagai kolej. Wat udah nganti Key laban seduai sama kelas.

‘ Key tumu ga nuan nganti bas. Minta ampun auk nyema aku ngenusah ke nuan malam tadi’ pia munyi jaku ari belakang Key. Key malik ke belakang tepeda ka Angela ngau kaban ya kebukai.

‘  Apu nama ga mata nuan biru. Sapa numbuk nuan?’ ko Angela ngelawa Key alu ka megai mata Key nyau biru. Key ngelari ke diri muka macha nota. Wat madah ke Angela nama utai nyadi malam tadi. Dia Angela ngau ati sinu mina merati ke kaban ya Key ari jauh. Key majak kisuk macha nota. Baru Angela nemu ulah ngau perangai Umek. Kempang amai ngaga kaban bakanya. Kaban ke selalu nulong ya. Dia kaban Angela ke bukai ngutuk ulah Umek. Kempang amai ngaga Key bakanya. Enda Umek nemu Angela nyabak semalam-malam ketegal Umek. Enda  Umek nemu Key mina datai ngaum Angela malam nya nadai lebih ari nya. Memacam sumpah sida ya ni ka ngasuh mati ni ke ngasuh lantak bas.

‘ Key…minta ampun aku Key laban ngenusah ke nuan’ pia ko Angela duduk sepiak Key. Key mina enda memunyi mina macha nota ya.

Pengudah tembu peresa Key mulai kediri ngagai hostel. Nyau ngantuk asai mata laban ya dani tumu amai ketegal ka belajar. Datai ba hostel Key nadai mayuh jaku. Pengudah muka baju dia Key ngali kediri ba atas tilam. Enda berasai mata nya pejam. Umek baru atai ba bilik meda kaban ya tinduk. Umek enda memunyi laban nemu salah diri mina ngawak ka kaban ya tinduk. Benung Umek duduk ba ruang tamu dia umek tepeda ka bup bechurak biru. Umek ngambi bup nya alu muka macha ya. Dia Umek tepeda list nama orang ke benung nanggam pegerindu dalam bup nya.

Nyau  2 minggu Key ngau Umek enda bejaku ngau pangan diri. Key mina ngaga pengawa ya empu. Maya lemai mupuk ga Key main futsal ngau sida Wat. Umek majak ngau ulah ya nguntik indu kin kia nyema Umek mai indu pulai ke bilik Key bemalam ngau Wat. Nyau kasih tudah Wat meda kaban ya Key. Tambah mega Key enda bejaku ngau Angela taja suba ya rapat amat ngau Angela. Dia Wat nusi ngagai Angela pengawa  ngau ulah Key. Angela madah ngagai Wat laban ya ka betemu ngau Key. Maya Wat madah ngagai Key dia Key mina enda memunyi.

‘ nama utai ka perandau nuan ngau aku?’ pia ko Key

‘ Key…ke amat ya ari suba aku ka ke nuan tang aku ngai madah laban aku ngai ngacau pelajaran nuan. Nyau meh aku bepangan ngau Umek amat aku selalu meda nuan. Selama tua bepangan terus terang aku madah aku mina 3 kali aja begulai ngau Umek. Taja pia ati aku tetap empu nuan’ pia ko Angela.

‘ Angela…nuan bajik mentas serta pandai. Keterubah tua betemu aku sigi bisi ati ka ke nuan tang nya meh Umek madah ke aku ya ka kenuan. Ari aku kehilangan kaban nyamai aku nyurut kediri aku engai berebut ngau urang tambah mega aku kitu laban ka belajar ukai ka bepangan. Nyema nuan madah tumu suba ngau ati tebuka aku nerima nuan. Suba pan baka diatu meh taja nuan udah begulai ngau Umek aku enda peduli ngau nya amat nuan empu aku’ pia saut Key. Nyangka meh pengaga Key. Nyau baka drama korea Key melutut ba mua Angela alu bejaku

‘ Angela…ngau ati tebuka jari tebuka aku nerima nuan ngau penyayau ngau pengasih aku meri ngagai nuan’ pia ko Key. Angela enda memunyi. Mina ai mata aja nyaut jaku ari Key. Enda Angela nemu selama tok bisi orang sayau ke ya lebih ari Umek. Enda ya nyangka kaban ke selalu ngau ya kulu kili maya tusah maya senang nya meh orang sayau ke ya.

Pengujung semester sebedau beserara Umek minta ampun ari Key ketegal penyalah ya selama tok. Key mina tuchum alu merap kaban ya. Dia Key meri kad jemputan melah pinang antara Angela ngau Key ngagai kaban ya Umek. Taja pia Umek nadai nyimpan ati benci ngau Key. Mina nyerah ke bup bechurak biru ngagai Key sebagai tanda kenangan seduai ya. Key merati ke bup nya. Angela betabi ngau Umek ngasuh Umek datai maya seduai melah pinang ila.

‘ bup nama nya hubby?’ tanya Angela

‘ BUp DAIRI PENGERINDU’ saut Key

‘ meda ya hubby’ ko Angela. Manah tua nulis nama ditu ulih tua baka orang ditu begulai sejalai tambah mega tua ka jadi melaki bini ila ni nemu bup tok ngamat ke jaku’ sambung Angela. Key mina nitih ka Angela. Ya nemu Angela sayau amat ngau ya. Key pan sama sayau. Seduai nulis nama diri dalam bup nya. Bup ka megai danji. Danji begulai sejalai idup semati.

Genap ari bulan seduai Angela ngau Key melah pinang dia meh Umek nyadi pengapit Key malamnya. Nangka pengerami orang malam nya. Nyau semalam-malam sampai pagi orang ngirup betanda malam nya. Nyau mabuk Key ngau Umek. Mayuh amat utai diperandau ke sida ya 3. Angela ngai jauh ari laki ya. Mayuh amat pengingat maya belajar suba ditusi sida ya 3. Nasib Angela ngau Key amat manah. Bup nya enda nyadi ke seduai mansa laban seduai udah ngamat ke danji. Danji seidup semati. Belelang meh bup bechurak biru ngiga mansa baru tang nyema Angela ngau Key enda ngamat ke danji bup ya sigi datai baru nangih danji. Lenyau meh bup bechurak biru ngiga mansa ke baru. Orang ke benung nanggam pengerindu . Orang ke enda ingat ke danji.

CHAPTER THREE ( THE LOVER)

‘ Jay sebedau nuan mupuk aku bisi hadiah gai nuan’ ko Lisa ngelalai ka jari ya ba belakang. Jay ngetu malik ngagai Lisa.

‘ Nama deh? Jampat aaa ka mupuk bas aku’ pia ka Jay tuchum meda madik ya Lisa.

‘ Tok hadiah ngagai nuan auk. Simpan manah anang muai ya’ pia ka Lisa. Jay enda bejaku mina ngambi bungkusan bechurak merah beri Lisa. Jay bejalai nuju ngagai bas sebedau iya masuk dia Jay meda madik ya ari dalam bas. Sinu asai ati ninggal ke kampung sida ya tang nya meh ketegal ngiga pemandai Jay mupuk ngejang ngagai menua bukai.

Jay mejam ke mata ya maya duduk dalam bas. Taja ati sinu ninggal ke kampung ya tang nasib meh Jay bisi orang ke disayau ba kolej endur ya belajar benama Winry. Jay tuchum kediri ingat ke pangan ya lama amat seduai enda betemu nyau sebulan ketegal kolej endur ya belajar cuti penggal tauka cuti semester. Jay merati ka talipun binching ya angka Winry bisi mesej ya.

Bie, nganti ku legi auk. ku ka seretai ngau bie. Pia munyi mesej ari Winry. Jay mina tuchum aja malas mesej orang ke disayau ya. Kitai benung bepangan pan kekadang tuchum meh maya mesej ngau pangan diri. Tusah ga kena rampit penyakit digelar penyakit A tok. Jay semampai ingat ngagai Winry. Enda berasai Jay datai ba terminal bas. Dia Jay nurun ngiga pangan ya.

Ari jauh Jay meda siko indu nangka pemajik buk panjai kemerahan mata bulat baka indu korea pemurak baka upa pantu peninggi umbas ya ngena tancut jean bechurak biru baju kaler burak megai handbeg kaler ‘pink’ benung ngangkat ka jari ngepai Jay. Jay tuchum kediri meda ulah pangan ya Winry. Ngau lengkas Jay ngelawa pangan ya.

‘ Hai bie lama nuan dah nganti?’ pia ko Jay

Winry mina meda pangan ya. Siko laki cukup narit ati ya. Jay dah ga tinggi tubuh besai buk pesen terangkat katas mua baka cina ngau pemurak ya ka sama ngau Winry bisi lesung pipi ba kuyu kiba. Taja Jay laki tang ya nemu ngintu diri. Diatu ukai indu ja nemu ngintu diri tang laki nemu meh. Nya ngasuh Winry majak sayau ngagai Jay. Winry maut lengan Jay ngemai Jay duduk makai ba kedai enda jauh ari terminal bas. Jay mina nitih ke Winry aja. Jay nemu Winry amat lelengau ke ya.

‘ Jay….bisi nguntik indu bukai bie maya cuti tok tadi? Anang bula aaa…’ pia ko Winry nyeling tajam ngagai Jay.

‘ Nadai la, bie rani murkejee nguntik ngai meh aku laban aku bisi bie. Amat ku mali bula tau’ pia saut Jay.

Winry mina tuchum meda ulah pangan ya. Baka selama Jay mesan ke seduai ai irup ngau pemakai. Pegudah seduai ngintu diri dia seduai ngena teksi pulai ngagai hostel endur seduai belajar. Penyauh jalai ngagai hostel bisi 45 minit.

Pengudah nganjung Winry ngagai hostel ya Jay mupuk mulai kediri ngagai endur ya diau.Datai ba hostel dia Jay meda bala kaban ke serumah ngau ya semua udah datai benung ngadu ke barang sida ya. Nyau capuh sida ya gauk ke pangan diri. Lama amat enda bepeda mayuh amai cerita pansut enda berasai ari ngalih malam.

‘ Ucak, aram kitai makai ba kedai buruk ka berapi. Lama enda meda bala orang bejual  ba baruh udah ga tok insap abis tok.’ Pia ko Yick kaban paling rapat ngau Jay. Taja Yick bangsa kayan tang ya nemu amat jaku iban. Nya meh menua sarawak kini-kini sigi jaku iban kena orang cina melayu nemu meh jaku iban. Jay masuk ke baju ya nitih ari belakang.

‘ Anang guai lok cak ka ngambi mem ku lok ‘ pia ko Jay bejalai laju nuju rumah Winry. Yick mina meda ulah kaban ya ari jauh. Yick nemu seduai udah lama bepangan  tama taun tok bisi 2 taun seduai udah bepangan. Yick nemu kaban ya amat sayau ngagai pangan ya. Suba maya mula belajar ba kolej nya Jay nadai kala bepangan ngau indu bukai tambah mega Jay ukai ‘play boy’.  Winry ngau Jay bepangan ari mula tama belajar suba. Nyema Winry praktikal ba sepital Jay selalu nganjung Winry ngagai endur ya praktikal. Tambah mega nyema Winry bisi masalah   Jay bisi ba tisi Winry. Nyema nurun belajar seduai selalu bejalai seretai tang amat Jay bisi pangan Jay enda kala ninggal ke kaban ya.

Datai ba kedai sida ya 3 duduk ba meja. Baka selama Jay mesan ke seduai ai irup ngau pemakai.

‘ Jeles mat aku meda seduai 2 taun bepangan tang nadai kala aku meda seduai belaya tau ka ngaga ulah ba belakang siko-siko. Nama rahsia seduai ulih bepangan ngelamanya? Sigi da agi kemaya kitai ka ngerami ke seduai deh?’ tundi Yick. Jay mina ketawa ninga jaku Yick. Ya nemu Yick sigi selalu betundi ngau ya. Winry mina tuchum meda ulah pangan ya.

‘ Bie…next week praktikal aku ba menua aku empu din. Kira 6 bulan aku din ila’ pia ko Jay

Winry enda memunyi majak ngayam telipun binching Jay. Tusah ga indu nyema maya bepangan abis utai dicek. Tanda sayau meh. Jay enda memunyi mina meda ulah pangan ya ngau tuchum aja.

‘ Anang irau bie nadai aku mesej kol ngagai indu bukai. Indai ngau madi ku bisi meh. Aku sigi sayau ngau bie. I promise’ pia ko Jay ngangkat ke jari baka orang ke besumpah. Winry mina tuchum megai jari Jay. Irau amai asai ati Winry ngelepas ka Jay taja 6 bulan aja asai ka 6 taun enda betemu. Pengudah ngintu diri sida pulai ke hostel. Winry nitih ka Jay ngagai hostel Jay. Lama amat enda ngayam pengerindu. Lama amat enda enda madu pengerindu. Udah ga Jay ka mupuk praktikal ba menua ya ba Kapit. Jauh amai menua nya taja agi dalam sarawak. Tambah mega minggu baru Winry bisi test ga.

‘ Bie ka diting ngau aku he he he he…..anang irau bie aku sigi enda kala mungkir danji’ pia ko Jay madah ngagai Winry. Winry semina meda pangan ya ngau mata tik sinu ngau ati tik gaga meda pangan ya ngamat ke jaku. Winry nemu selama seduai bepangan Jay nadai kala ngaga ulah taja mayuh peminat. Malam nya Winry tinduk ngau Jay. Ngelepas ke semua pengerindu dalam ati.

‘ Bie nama utai dalam tok bie? Ulih ku muka ya?’ pia ka Winry duduk sepiak Jay megai bungkusan bechurak merah.

‘ Utai beri madik ku sari nya sebedau ku mupuk kitu buka meh bie angka bisi ruti dalam nya’ pia ko Jay. Winry muka bungkusan nya. Dia Winry tepeda ka sigi bup cukup manah. Bup bechurak biru beselit ka pen merah betulis DAIRI PENGERINDU. Winry muka bup nya macha utai ka ditulis dalam bup nya.

‘ Bie peda nuan bup tok semua orang ke kala nulis nama dalam bup tok kawin magang ulih tua nulis nama tua dalam bup tok angka tua baka sida ya meh ila’ pia ko Winry. Jay mina naggun ke pala  nitih ke jaku pangan ya. Pengudah nulis nama seduai bedanji ba mua bup nya segulai sejalai enda ngira tusah ngau senang ngau seidup semati selama ya. Tang seduai ya enda nemu nama dalam bup nya orang ke udah segulai sejalai. Bup nya meda dua iku anak mensia benung nangam pengerindu begulai malam nya. Dua iku anak mensia ke setuju bedanji seidup semati.

Pengudah meli tiket bas Jay ngangkat ka beg ya. Sebedau tama dalam bas Jay merap Winry. Jay nemu 6 bulan seduai enda betemu ila.

‘ Bie mupuk aku nyema bie bisi nama-nama ila madah ngagai aku auk. bie jaga meh diri ngau manah auk.’ pia pesan Jay murus kuyu Winry.  Winry  mina meda Jay ngau mata beai. Begadai Jay ngelepas ka jari Winry.

‘ Jaga ke aku Winry ucak. Nyema bisi nama-nama madah nuan ila ok?’ pia ko jaku Jay ngagai kaban ya Yick.

‘ Anang irau kaban aku bisi nyaga ya. Nyema bisi utai nyadi ila ku madah ga’ saut Yick.

Pengudah tama dalam bas Jay merati ka mua Winry ari dalam. Indu ke disayau ke ya. Enti nyema ke jaku ngai meh Jay jauh ari Winry tang kolej udah ga ngatur endur ya praktikal semina nitih aja meh tudah ya. Datai ba kapit Jay nelipun ayak ya minta anjung ngagai endur ya diau. Taja ati sinu ninggal ka sulu ati Jay dia meh Jay ngering ke diri. Ukai lama 6 bulan nya pejam encelak abis 6 bulan nya. Pia runding tudah Jay. Datai ba endur ya diau Jay muka beg tepeda ka bup bechurak biru. Dia Jay meda nama seduai ditulis Winry. Ati Jay nangka penyinu. Mina telipun aja nyadi penghubung seduai ya.

6 bulan udah lalu Jay enda sabar ka pulai ngagai endur ya belajar. Asai ka lama ya enda bepeda begulai ngau Winry.

“ nama ga bie enda malas mesej aku. Udah 2 minggu enda mesej aku kol aku angka ya mayuh pengawa kini” pia jaku Jay kediri. Udah 2 minggu Winry nadai mesej Jay selama tok ninting jam ninting ari Winry mesej ngagai Jay tang diatu Winry nadai ga kol ya. Bisi sekali Jay kol ngagai kaban ya Yick nanya ka Winry tang lain amat ga saut Yick. Nya ngasuh Jay ngiga spare tayar ngau Yick bisi meda Winry ngau laki lain bejalai ba pasar. Tang jay enda pecaya angka bala Winry pia ga saut Jay. Yick pandak jaku ninga saut Jay. Ka ya madah mayuh agi ngai ke kumbai ngerusak hubungan urang ga.

‘ Jay nyema nuan enda pecaya ke aku ila meh nuan meda diri empu. Ukai aku ka ngerusak ke hubungan seduai tang nama utai dipeda aku nyata kaban. aku kasih ke nuan ngai ke kena tipu. Indu bajik ukai ulih pecaya amai mayuh agi orang bukai ka ngulih ka ya. Tambah mega nuan semina pelajar ukai bisi keja baka orang bukai.’ Pia jaku saut Yick madah ngagai Jay. Jay enda memunyi ninga utai ka dipadah ka kaban ya. Enda patut winry ka ngaga ulah ba belakang aku. Winry semina sayau ngagai aku siko. Pemuas jay berunding dia Jay tekinsit ati ka nelipun Winry. Ngau lengkas jari Jay naip numbur Winry.

‘ helo sapa tok?’ pia munyi saut nyawa laki ba telipun Winry. Puas Jay nelipun Winry semina nyawa laki didinga ya. Mesej Jay ga Winry tang nadai ga dibalas. Malam sigi Jay nelipun baru tang semina nyawa laki ga nyaut. Bendar tudah Jay meda numbur ka didail ya angka salah tang nya meh numbur Winry.

Pagi ari siti Jay enda berasai nyamai ati tudah. Maya praktikal pan ya enda entu ulih ngaga pengawa. Semina Winry ja dalam runding ya. Bendar tudah Jay muai ati prasangka tang enda ga ulih. Ka ya ngaga assignment ya nyau kebukai ari ga runding Jay. Dia Jay mai ati tusah duduk ba pondok luar sepital endur ya praktikal. TRIIITT  TITITIT TRIIT… munyi telipun Jay. Jay muka mesej ba telipun ya.

‘ Jay minta ampun ngagai nuan aku enda madah ke nuan maya cuti lebuh nya aku udah betunang ngau orang bukai. Laki ke nyaut telipun aku sari nya nya meh tunang aku. Minta ampun aku ngagai nuan nyema selama tok aku belalai ari nuan. Giga nuan meh orang bukai manah agi ari aku taja aku nemu nuan sigi sayau ke aku’ pia munyi mesej terima Jay. Asai ke di pandam dada tudah Jay meda mesej baka nya. Asai ka enda pecaya ya Winry indu ke disayau ke ya nyau udah betunang ngau orang bukai. Jay enda nemu nama utai digaga mina macha mesej nya sekali agi. Jay nguji telipun ngagai Winry tang enda ga ulih. Nyentuk ke malam Jay agi nguji telipun ngagai Winry tang enda ga disaut.

Pegila abis meh tempoh Jay praktikal. Abis praktikal Jay mupuk ngagai terminal bas malam nya ga. Jay ka ninga ari mulut winry empu. Ka nemu nama sebab Winry sanggup ninggal ke ya. Datai ba hostel pengudah nyimpan barang dia Jay ngiga Winry ka ninga nama kebuah winry kempang amat ninggal ke ya.

‘ Jay…minta ampun aku ngagai nuan aku udah betunang ngau orang bukai. Giga nuan meh indu bukai manah agi ari aku’ pia jaku Winry ngau sesabak. Jay enda memunyi tang ati dalam din nangka pemedis.

‘ Winry sebedau aku ngelepas ke nuan ngau orang bukai ulih aku begulai ngau nuan. Aku ka begulai ngau nuan makai ngau nuan bejalai ngau nuan. Enda mayuh pinta aku semina sari ja. Amat tua begulai nadai lebih pinta aku’ pia saut Jay. Winry enda bejaku mina naggunke pala aja.

‘ nyema nuan setuju pegila ditu aku nganti nuan’ ko Jay nguing mupuk mai ati pedis mulai ke diri ngagai hostel. Jay tama dalam bilik ngurung diri mina beteman ka gambar seduai Winry. Dia Jay nyelit ka gambar seduai ba dalam bup bechurak biru betulis DAIRI PENGERINDU. Enda berasai neritik gegadai ai mata Jay. Taja lelaki nyema pengerindu putus tengah jalai enda berasai ai mata naya. Pemedis ati penyinu ati. Pengelama bepangan nemu nya putus ba tengah jalai. Pengerindu dikayam di tanggam selama 2 taun anchur pia aja. Jay ngering ke ati diri ngai ke ditemu bala kaban sebilik ya benung tusah ati tang kaban ya nemu. Nemu penusah ati tudah Jay. Yick datai bejaku nanya rita kati baka may praktikal awak ka ati Jay senang mimit. Taja Jay senyum ketawa tang ati ya nangka pemerinsa.

Pukul 8 Jay udah nganti Winry. Ari jauh Winry datai ngelawa Jay. Winry ngena skirt jean baju burak kasut tunjik tancang buk ba belakang.

‘ Bajik amat nuan Winry tang sayau nuan enda di empu aku’ pia runding Jay. Jay nemu setiap jam setiap masa amat berega saritu laban saritu aja ya ulih begulai ngau Winry sebedau ya ngelepas ka Winry ngau orang bukai. Saritu aja Jay ulih bepegai jari begulai baka seduai suba. Saritu aja meh seduai agi makai begulai bejalai begulai. Ninting jam Jay merati ke jam ba jari ya. Tang jam amat jeles ngau tudah ya jampat amat jam belalu. Enda berasai ari siang ngalih malam. Sebedau Jay ngelepas ka Winry dia jay bejaku

‘ Winry sebedau aku ngelepas ka nuan ngau orang lain ulih aku betemu ngau tunang nuan? Ukai aku ka belaya tang aku bisi utai ka padah ngagai ya ‘ pia ka Jay. Winry mina nitih jaku Jay aja. Dalam kandang 15 minit datai siko laki pandak agi ari Jay ngena jeans betemu ngau seduai ya. Winry pan ngelawa laki nya megai jari laki nya. Dia Jay ka bejaku ngau laki nya alu ngasuh Winry bejalai enda lama.

‘ Ungal aku ka betemu ngau nuan ukai ka ngelaya nuan enda tang aku bisi tai ka padah ngagai nuan. Semina siti aja aku ka nuan bedanji ngau aku enti ulih anang ngasuh Winry nyabak nyema ya nyabak berap nuan ungal nyema Winry mai nuan bejalai titih ke aja nama ko ya tang ungal utai ke mesti di ingat nuan kemaya birthday ya ngau maya birthday ya nuan meri hadiah bungai rose merah sigi ngau anak patung mashimaro. Maya malam birthday ya bai meh ya makai ba luar sebagai nyambut birthday ya tang nuan mesti ngaga surprise maya nya. Ingat jaku ku ungal udah tok aku sigi enda ngacau seduai agi ngau ati tuchi beresi aku ngelepas ke Winry ngagai nuan ungal. Nyema seduai bisi penusah ka apa ka madah ja ungal anang irau aku sigi datai nadai nama-nama ulih petaruh ke aku ungal mina nyawa aku aja awak ke seduai ulih begulai sejalai ila’ pia munyi jaku Jay alu betabi ngau lakinya sebedau ya mupuk mai ati beraie. Laki nya enda memunyi laban ya  ninga jaku Jay amat-amat sayau ngau Winry.

Datai ba hostel dia Jay duduk nunga langit biru. Dia ya meda bup bechurak biru alu macha nama seduai ya. Ngau ati sinu ya meda gambar seduai ya Winry suba. Semua pegrindu nya mina tinggal kenang.

‘ aram cak ngau kami main futsal. Enda cukup orang tok ulih ga nuan ngesow ka skil legi’ pia ka Yick nyapa Jay benung ngelamun kediri. Jay alu angkat nukar tancut pandak nitih ka kaban ya Yick. Padang futsal enda jauh ari hostel sida ya. Maya nya bisi ga kaban ya Dav ngau mai kerita. Taja sida betundi dalam kerita tang ati dalam din nangka pemedis. Maya sida ya mupuk dia Jay tepeda ka Winry ngau laki ke bejaku ngau ya tadi benung ngirup. Benung sida sebuat mupuk ngagai padang futsal enda mukai-mukai lori pansut alu ngelantak kerita kena sida sebuat. Jay tepelanting pansut ari kerita. Mina munyi ambulan aja di ingat ya udah nya semua utai celum magang.

Tang tali seput Jay enda panjai darah nyau tepancur pansut ari perut ya. Dia Jay meda besi tecugak ba dada ya. Maya dalam perjalanan ngagai sepital Jay mina meda mua kaban ya Yick ba sepiak ya. Begadai ya megai jari Yick. Yick mina telih ba pala ngau patah kaki aja. Dia Jay bejaku

‘ Yick…..angka nangka tok aja tua bekaban…..enda panjai seput aku cak……ulih nuan nyaga Winry ke aku?’ gegetar tudah Jay ngabis kejaku madah ngagai kaban ya Yick. Empai sempat Yick nyaut jari Jay gegadai labuh mata Jay pejam enda memunyi. Yick mina nyabak aja meda kaban ya. Dav bendar ncuba nyambung seput Jay tang Jay udah midang lesi mupuk ngagai batang mandai.

Ninga rita Jay udah nadai dia apai ngau indai ya mupuk ke sepital meda anak tuai ya udah ngejang pegi. Nyau rerauh indai Jay meda bangkai Jay. Inek Jay nyau luput enda pecaya ucu ke disayau ke ya ngejang tumu agi ari ya. Lisa madi Jay merap tubuh Jay ke tengkering. Bala kaban Jay kebukai datai meda niang. Enda nyangka Yick kaban ya baru atai ari praktikal udah nadai enda nyangka kaban ya ke tusah ati putus pengerindu udah ngejang pegi. Taja pan udah putus Winry datai meda niang. Ngau sesabak Winry merap tubuh Jay ke tengekering.

‘ enda ku nyangka nuan udah pegi ninggal ke aku. Enda ku nyangka pegrindu nuan ngagai aku cukup dalam. Bie aku ka pulai baru ngagai nuan tang nuan ga ninggal ka aku’ sada nyawa Winry. Ka bakani sida nyabak ka Jay enda meh ulih Jay pulai baru  semua pengerindu semua pegingat bekaban bai Jay magang tang semua danji enda bai Jay laban danji udah ditulis. Ditulis ba sigi bup bechurak biru. Bup dikangau bup DAIRI PENGERINDU.

Pengudah seminggu Jay ngejang pegi dia Winry pulai ke menua mai tunang ya benama Jackson. Bala Winry nemu seduai jadi enda lama agi. Datai ba rumah Winry semua utai udah sedia. Nangka pengerami orang nyambut seduai. Ni ke bambu isan bambu ipar bambu meyadi. Winry enda memunyi semina nyerah diri ngagai takdir. Winry udah milih orang bukai ngau ya begulai sejalai seidup semati tang danji tetap danji. Benung seduai besanding ba ruai dia Winry tepeda ka orang baka Jay. Peninggi pemurak penyigat amat sama sekali baka Jay. Laki nya semina meda ya ngau mata tajam. Gegadai laki nya ngangkat ke jari nunjuk ngagai  Winry. Winry pan malik kebukai.

‘ Angka orang bukai’ pia runding Winry. Kali kedua Winry meda tang orang baka Jay nadai agi dipeda.

Malam majak jauh. Orang nangka pemayuh datai meda seduai melah pinang. Nyau sampai pagi agi meh orang rami nyau capuh ja ba ruai bala bujang dara betanda bala ke tuai bebuti ngau pangan diri. Winry angkat ka kemi. Begadai Winry bejalai laban bekau ujan takut tekelincir ba tanju. Benung Winry bejalai dia ya tepeda ka siko laki ba tanju bediri meda ya.

‘ ….WINRY..NI DANJI NUAN NGAU AKU….WINRY….’ munyi orang ngagau ka Winry. Celap asai tubuh Winry ninga nyawa nya. Winry ngelala nyawa nya. Nyawa orang ke selalu ngau ya suba. Ngau sesabak Winry ngiga sada nyawa nya. Dia Winry tepeda ka Jay tuchum meda ya ngulur ke jari. Jay semampai sigat baka suba tinggi tuchum manis tepeda lesung pipi ba kuyu kiba

‘ Winry aku nemu nuan sayau ke aku aram meh  tua begulai sejalai ingat ke danji tua suba. Winry aku amat-amat sayau ke nuan’ ko Jay. Winry alu ngulur ke jari megai jari Jay. Ngau sesabak Winry merap Jay. Pagi nya nyau begau sida serumah meda bangkai Winry labuh ari tanju. Tang ke amat ya Winry ngau Jay udah begulai sejalai danji udah ga ditepati. Taja pan mati seduai tetap begulai.

PAP! Munyi utai labuh ari meja niang Jay. Dia Yick meda bup bechurak biru betulis DAIRI PENGERINDU labuh ari meja Jay. Gegadai Yick ngambi bup nya alu macha utai ke ditulis dalam bup nya. Nyau berunding tudah Jay tepeda nama Jay ngau Winry dalam nya nya. Pia utai ke ditulis dalam nya

JAY + WINRY----------------------------------------------------UDAH KAWIN

Ya ke ditemu Yick Jay ngau Winry udah midang lesi. Yick nyimpan bup nya nyadi tanda kenang ya ngau kaban ya suba bup ke betulis DAIRI PENGERINDU…………

CHAPTER TWO (THE LIAR)

Pemulai Ikie ke menua dia Ikie betemu ngau ika iya Apai Igat.

‘Baru datai nuan adik’ pia ko apai igat. Ikie enda bebunyi mina tuchum aja. Ikie bejalai lelubah tama ke bilik. Apai igat semina meda madi ya ngau ati tik sinu. Apai igat nemu Ikie agi ingat ngagai niang bini ngau kaban ya. Taja pia apai igat enda kempang nanya semina ngelila ka ulah tudah Ikie. Sepenglama Ikie ba rumah panjai iya enda entu bejaku. Sida apai indai ya pan enda mayuh tanya semina meda ulah anak sida ya kelalu tusah ati. Pengudah dua minggu ba rumah panjai Ikie mupuk mulai kediri ngagai bandar ndur ya gawa.

‘Igat alai nuan nulong ayak nuan ngangkat ke barang ya bai ngagai pendai kitai din nuan ngau ya nganti seperis legi. Kasih tudah ayak nuan nya’ pia ko indai igat ika Ikie. Indai igat mina meda ari tanju laban tudah ya benung ribat. Igat nurun ngau ayak ya Ikie nganti seperis ba pendai sida ya. Apai igat udah mupuk ke pasar laban pengawa apai igat deriba kereta ba sepital.

‘ Aram igat ngau ku ke pasar nuan. Lemai legi nuan pulai baru ga. Nadai orang ngau aku apai nuan bc ga pengawa ngai nyadi aku ngacau ya’ pia ko Ikie mina bejaku. Igat enda bejaku semina nitih ke jaku ayak ya aja.

Pengudah seperis datai seduai pan mupuk ngejang ngagai pasar Kapit. Pejalai seperis ari rumah sida ya bisi ga sejam setengah laban nitih ke ai. Nyema ai surut laun gik ga datai. Menua Ikie kelalu jauh dalam Kapit tambah mega pejalai seperis mansa Wong dikumbai orang wong pelagus. Datai ba kapit dia Ikie mai anak betungal ya ngirup dulu sebedau tudah tuai mupuk ngena seperis pukul 10 ngagai Sibu.

‘ Tok duit belanja ngau tambang nuan legi. Jaga manah indai nuan ke benung ribat nya auk igat. Nyangka apai nuan mayuh pengawa tusah ga ya legi’ pia ko Ikie madah ngagai igat mupuk bejalai nurun wap sibu.

Pengudah ikie mupuk dia meh igat ngagai wap balleh nganti seperis ngagai menua sida ya. Seperis mina dua igi ja bejalai sari. Dia meh igat meli tiket ngena seperis pukul 11. Sebedau mupuk igat ngagai kedai meli ruti ngagai indai ya. Benung bejalai dia igat tepeda ka siko orang baka apai ya benung bejalai ngau siko indu biak agi ari ya. Meda utai bakanya dia meh igat nitih ke dua iko nya begadai-gadai ngai ke temu orang.

‘ Apu amat apai aku nya td. Nadai guna-guna tuai majak kanji’ pia ke igat sambil ngetup ngeli ya. Bendar igat ngetan kediri meda ulah apai ya madah diri empu gawa nemu nya gila indu bukai enda nemu bini diri empu benung ribat ba rumah. Ngau ati pedis dia igat bejalai ngagai ponduk endur orang nganti seperis. Enti nitih ke ati sigi laya igat apai ya tadi tang ngai nyadi. Igat nemu ya ngau indai ya semina ‘begantung’ ngagai apai ya ngiga belanja sida ya.

Benung igat duduk kediri ba pundok dia igat tepeda sigi bup. Bup bechurak biru bisi pen merah dalam ya.ka igat ngmbi bup nya ya takut angka bup nya bup orang bukai enda alah kumbai orang enchuri legi. Pengudah pengelama duduk dia nadai ga orang ngambi bup nya dia ati igat tekinsit deka meda bup nya. Gegadai tudah igat angkat ngambi bup bechurak biru nya nyimpan dalam plastik endur ruti ke beli ya tadi.

Datai ba rumah igat enda memunyi lalu tama ngagai bilik ya. Dia igat muka macha bup nya. Dia igat tepeda bup nya betulis Dairi Pengerindu ba dalam ya.

‘ Nyelai amat bup tok nyangka pemanah karung ya bechurak biru tang nadai ga orang ngempu ya’ pia runding igat macha utai dalam bup nya.

‘ Enti amat utai ke ditulis dalam bup tok nyadi manah aku nulis nama apai ngau indai aku dalam bup tok awak ka apai aku enda gila indu bukai. Kasih indai enda nemu ulah apai ngayah ke indai’ pia runding igat.

Dia igat nulis nama apai ngau indai ya awak ka seduai panjai begulai tang igat enda nemu. Igat enda nemu igat udah nulis sigi danji. Danji ngasuh orang begulai sejalai sampai mati. Igat enda nemu bup nya ulih ngiga orang ka mungkir danji. Enda nemu bup nya milih orang nyadi mangsa. Bup nya meh ulih ngamat ke danji. Pengudah nya igat nyimpan bup nya dalam beg ya.

Genap 9 bulan dia meh indai igat berasai enda nyamai. Anak dalam kandung ya majak engkasak.

‘Apai igat asai ka beranak aku tok wai. Aram tua ngagai klinik pedis amat perut aku tok’ pia ko indai igat.

Apai igat tekenyit jampat angkat ngambi moto sped 30 dalam stor. Udah ga malam nya ujan beberis tambah agi maya nya jam nunjuk pukul 3 pagi.

‘Igat ambi nuan picit legi jampat keh indai nuan ka beranak nya aram tua nganjung ya ngagai klinik’ nyau rerauh apai igat madah ke igat. Igat alu angkat ngiga picit ba dapur dah nya nitih ke apai ya ngagai pendai ngetan ke perau maya apai ya nyangking ka moto sped ba perau. Pengudah nya apai igat ngema indai igat mai ya ngagai perau. Igat ngambi kimis ba stor nadai kena ngelindung indai ya maya pejalai ngagai klinik. Penjauh klinik ari rumah sida ya bisi 45 minit.

‘ igat nuan ba luan legi megai picit nengau ke kitai jalai ngai ke ngelantak kayu tambah ai pasang maya tok’ pia ko apai igat. Igat mina nitih ke jaku apai ya ngengau jalai awak apai ya enda ngelantak kayu maya deriba moto sped. Indai igat ba tengah perau benung ngetat ke pemedis. Abis basah tudah igat ngau apai ya kena ai ujan. Igat majak ngelindung indai ya ngai ke celap tambah agi indai ya nyau ka beranak.

‘ Pepeda indai nuan igat angka enda ulih tat ka ya legi nyau beranak ba atas perau’ pia ko apai ya ari belakang benung nimba perau ketegal ai ujan nyau majak balat-sebalat.

Igat majak irau ngau indai ya nya majak rerauh ba tengah perau. Enda la dah nya igat nengau indai ya takut indai ya beranak. Indai igat benung ngetat ke pemedis ka beranak megai kimis ngelindung ya ari kena ujan. Enda lama dah nya igat nengau meda jalai takut ngelantak kayu ba ai sungai. Ai batang rajang majak deras serta pasang nyangka pengelaju.

Kali kedua igat ngengau indai ya dia igat meda darah nyau baka nama ba perau dia.

‘apai laju agi kitai nyau bedarah indai.’ Pia ko igat madah ngagai apai ya.

‘ peda nuan luan perau dia igat takut ngelantak kayu legi’ ko apai igat.

Pengudah 5 minit indai igat nyau enda memunyi. Ati igat asai enda nyamai. Dia igat nengau indai ya ba tengah perau. Nangka tekenyit igat meda indai ya benung makai anak ke baru ada. Darah nyangka pemayuh ba perau. Dia igat meda indai ya nyau tumbuh taring buk panjai mata merah benung nganit anak mit. nyau baka mayau makai cit indai ya tadi. Kukut indai ya nangka pemanjai ngeruas ka perut tudah anak mit ke bedau ngelala dunya. Anak mit bebalut ngau darah ngau tali pusat. Indai igat baka ke enda peduli igat meda ya indai ya majak matah mutus neruyak ka perut anak mit nya.

‘ Apu salah pengawa baka tu’ pia ko apai igat mansang ngagai indai igat ke benung ngeruas ka anak seduai ke baru ada.

Enda mukai-mukai indai igat angkat ngetup rekung apai igat

“ NUAN TOK LAKI NADAI GUNA” pia ko indai igat

Enda mukai –mukai igat ngau ati tik takut engkecit ke dalam sungai nyemerai ngagai rumah panjai seberai. Nadai nangi ke baya nadai nangi ke kayu igat nyemerai ngasak amat ngau pengering tulang tudah. Nangka penakut meda utai bakanya. Datai ba tebing igat belanda minta tulong orang ba rumah nya.

‘ ayak tulong aku ayak tulong aku.’ Ko igat madah ngagai siko apai tuai benung nimba perau.

Apai tuai nya enda memunyi ngemai tudah igat niki ke rumah. Dia igat madah ke sida ya nama utai nyadi. Nyau begau orang ba rumah nya nurun ngesah ke apai ngai indai igat. Semalam-malam sida ya ngiga apai ngau indai igat semina tetemu ka perau ngau bekau darah aja. Igat ngau sesabak meda bekau darah ngau kimis endur indai ya belindung ari kena ujan. Sampai ke siang nadai ga sida tetemu ke apai ngau indai igat. Nangka penyinu tudah igat pulai ke rumah madah ngagai aki ngau inek ya. Nyau rerauh inek ya  ninga penusah ke dipadah igat. Aki ya enda memunyi. Nadai kala utai bangat ngenusah tok nyadi. Nya sida serumah ngiga apai ngai indai igat.

Pengudah apai ngau indai igat midang lesi enda temu bangkai dia igat teingat ngagai bup bechurak biru. ‘ Amai meh bup tok ngamat ke danji tang nama meh munuh apai ngau indai aku. Aku semina ka seduai begulai sampai jemah ila tang nadai ngasuh munuh seduai ya’ pia ka jaku igat ngau ai mata neritik megai bup bechurak biru. Ngau sesabak igat muai bup nya enda berasai igat tetinduk ba katil. Meda ulah igat bakanya dia Lisa betunggal igat tama dalam bilik ngabas tudah igat. Dia Lisa tepeda ka bup bechurak biru dibuai igat dalam sampah. Bup nya amat narit ati Lisa. Bup ke betajuk DAIRI PENGERINDU…………..

my cat